導演邱禮濤與劉德華多年來合作無間，就算華仔墮馬受傷後復工，首選參與的作品，正是邱禮濤的新片，華仔更身兼兩職，為電影做監製及主演。邱禮濤坦言對方在行內懂得很多：「最怕唔識又多嘢講，華仔包容面比很多人都闊。」
邱禮濤執導新片《掃毒2天地對決》，是劉德華去年墮馬後復工的電影，邱禮濤說：「華仔意外後，唔係咁快百分百痊癒，要小心啲，唔係淨係佢，就算群眾演員動作場面，安全都係緊要。動作飛車總有方法拍，唔會因為佢受傷而唔要動作，點都能夠拍到，李連杰斷腳，《黃飛鴻》ending都拍到，最緊要唔好再受傷。」邱禮濤指華仔做監製顧及製作費也兼顧質素，他說：「華仔喺行內有好多事情都識，最怕唔識又多嘢講，華仔包容面比好多人都闊。」
陳家樂開條件
因不想電影太枯燥，邱禮濤加入了陳家樂及衛詩雅飾演情侶，邱禮濤還爆家樂講明有劉德華才拍，邱禮濤說：「過往搵家樂合作唔止三次，最終成事就三次，家樂話有劉德華先做。」邱禮濤笑指並非獲家樂請食檸檬，而是對方工作多，度期有難度。
一齊受訪的家樂即表示可以跟華仔合作，自己發夢都識笑，家樂說：「第一次同劉德華合作，海報有我同佢一齊，點都做，佢係監製好緊張部戲，今次齣戲有好多動作，對我嚟講唔係容易做到，自己好少揸真槍，揸槍要點行都唔係最熟，劉德華好熟悉揸槍，所以會走埋嚟教我哋。」
衛詩雅自言跟邱禮濤合作了四、五次，她說：「開心導演搵我演呢個角色，拍動作片新鮮好玩，我又鍾意開槍、吊威吔。」又指有身兼監製的華仔在片場，令演員感覺舒服，她笑言：「我好渣，如果有個好惡嘅人喺度我會好驚，我好易受人影響。我哋參與好多大場面槍戰拍攝，劉生令在場所有人以舒服嘅狀態去做好自己崗位，我學到呢樣嘢。」
衛詩雅讚三哥
除華仔，家樂和衛詩雅最開心是跟飾演警察的苗僑偉（三哥）一齊追捕毒犯，兩人大讚三哥有型，衛詩雅說：「我哋大部份戲都同三哥一齊，一到三哥拍槍戰戲，我哋會衝過去睇，因為真係好有型，揸槍跑好有型，而且佢開槍係唔眨眼，導演都話真係好有型。」家樂說：「開槍唔眨眼真係好難，開槍時好多火屎彈到眼，我同詩雅就係咁眨，三哥好似戴咗眼鏡咁。」
撰文：張俊銘
攝影：仇志德
場地提供：The Mira Hong Kong