上季歐聯冠軍利物浦喺星期二飛抵紐約，繼續球隊嘅美國之旅，備戰香港時間今日朝早對士砵亭嘅比賽。紅軍喺今夏轉會市場唔算活躍，至目前為止只係簽入咗荷蘭後防小將薛比雲丹貝治；距離英超轉會窗關閉剩低大概兩星期左右，領隊高路普喺紐約表示，紅軍仲會趁剩低嘅時間把握機會增兵。
高路普話：「我哋家陣仲觀望緊，睇吓係唔係有啱用嘅球員可以簽，今夏肯定唔會係利物浦進行大手交易嘅一次轉會窗，如果到最後都係冇任何新兵加盟，咁一定有當中嘅理由。其他球隊會趁轉會窗去建構一隊理想球隊，但我想講我家陣已經擁有一隊理想球隊，如果可以再簽入新兵係錦上添花，但簽唔到都冇問題。」