皇家馬德里星期二喺國冠盃對阿仙奴，半場落後2球下喺法定時間扳平2:2，再靠互射12碼反勝兵工廠，拿下季前熱身賽首捷。焦點之一係被視為教練施丹棄將嘅加里夫巴利獲派上陣，仲成為入波功臣；另一入波功臣馬高阿辛斯奧就遭逢重創，左膝嚴重受傷，初步估計會喺今年剩低嘅比賽全部缺陣，但對於巴利嚟講或者係好消息。
後備上陣嘅阿辛斯奧喺59分鐘幫皇馬扳平2:2，但之後同奧巴美揚搶波不慎扭傷左膝，初步檢查係左膝前十字韌帶撕裂，連半月板都斷裂，日內就會接受手術，未開「咧」已可能要收「咧」。
至於同樣喺後備上陣入波嘅巴利，賽後施丹對佢嘅去留稍轉口風：「巴利今場表現唔錯，我好開心，我唔知未來會發生啲乜，但目前佢仲係皇馬一分子，上場對拜仁佢唔想落場，但到今場佢有比賽渴望。」阿辛斯奧受傷，皇馬中前場進攻球員又少一個選擇下，除非球會可以搵到替補人選，唔係嘅話巴利睇怕都會留低。