吳岱融日前隨晨曦明星足球隊到沙巴踢友誼賽，之後與太太鍾淑慧和林韋辰等留在沙巴度假。不過周日吳岱融潛水時發生意外，一度呼吸困難、頭部劇痛，幸好及時入院醫治，但因為頭部持續性刺痛，所以他決定返港後會做個詳細的腦部檢查。
傷風鼻塞未癒
《蘋果》前晚聯絡到吳岱融，他表示在周日入院，經醫生診治後即晚出院，他說：「本來諗住浮潛，點知去到原來係深潛，因為玩咗兩日又飲咗啲酒，加上拍《大醬園》拍咗兩個幾月，有輕微中暑同埋傷風未好，鼻塞同傷風未好原來唔可以潛水，自己忽略咗，咁就走咗去照落水。」他續說：「落水後做晒啲基本嘢，落到20幾呎，開始覺得唔對路，個頭好似想爆炸，因為鼻塞減壓唔到，自己可能急咗少少上去，有個掣一撳就會急升上去，啲潛水輔導員即刻stop咗我，當時個頭反壓唔到好似爆炸咁，當時嘅我唔知發生乜嘢事，覺得好難呼吸，個頭好痛好爆，上水後頂唔順，返到酒店個頭一路keep住好痛，我擔心唔知係咪血壓太高，諗諗吓唔對路，自己入咗醫院check，醫生叫我吊鹽水，嚟緊返香港都要照一照。」
吳岱融形容現在頭部「發吓發吓」，他說︰「呢段時間要睇睇，因為唔可以上飛機住，所以奉勸大家要了解自己身體狀況先好潛水，捱夜同飽得滯，尤其傷風鼻塞千祈唔好潛水，呢次真係好大教訓。」其實，吳岱融有多次潛水經驗，他表示慶幸由頭到尾有教練在旁，阻止他太急促浮上水面，他說：「可能升得快，個頭好似爆炸，好彩有instructor阿Jack沿途睇住我，我潛咗落20幾呎，係佢拉番我上船，當時基本上我都控制唔到自己呼吸。要講聲多謝阿Jack，佢係我救命恩人，如果唔係老婆都見唔到我。」
失聯老婆擔心
鍾淑慧表示當日沒有隨老公潛水，所以不知道老公入院，由於有數小時失聯，當時十分擔心：「總之就嚇死我！夏天啲人好鍾意玩潛水，如果冇經驗，真係唔知傷風會搞到咁大鑊。佢返嚟都要body check，因為個頭一路刺痛，尤其係激動講嘢同興奮少少，個頭就即刻刺痛，所以返嚟要照吓個腦。」
採訪：魯吉