講開何君堯累街坊，其中一個受累肯定係《經濟日報》副社長石鏡泉。佢上星期六出席「守護香港」集會，係大台講「教仔需用藤條及水喉通」言論，結果星期日元朗暴徒真係用藤條同水喉通周街打人，而石前晚出聲明道歉及收回言論，但市民同網民明顯唔收貨，噚晚經濟日報集團發通告，公佈石鏡泉辭任執行董事及副社長一職，即日生效，明顯想割席止血。
辭職即時生效
根據經濟日報集團年報資料，石鏡泉舊年董事酬金為346萬元，集團仲向石鏡泉全年支付25.3萬撰稿人酬金，據經濟日報集團發嘅通告，石鏡泉仲係經濟日報集團嘅專欄作家，即係佢25萬撰稿人酬金應該仲保得住，但346萬元董事酬金怕且凍過水，八方估石鏡泉冇諗過上台講幾句野，咁就冇咗三球半！石嘅損失唔知何君堯會唔會補償畀佢？定係要問西環畀返佢呢？