明年財政預算案仲有大半年先至公佈，政府連諮詢都未開始，新民黨主席葉劉淑儀就一個箭步，衝咗去約財政司司長陳茂波，提交建議，一開口就話要攞500億，向全港18歲以上嘅市民，無差別如仙女散花般人人派8,000蚊。乜葉劉唔係唔支持呢啲全民派錢嘅理財學嘅咩？大家唔使再「黑人問號」，11月區議會選舉殺到，建制派唔再嗌吓啲民粹口號，就快俾近幾個月嘅反送中浪潮夾死㗎喇。
葉劉噚日主動約見財爺講預算案，要求政府全民人人派錢8,000元，涉款500億元，唔洗審查。以往曾反對全民派錢理財哲學嘅葉劉，否認要求政府派錢與選舉臨近有關：「你（記者）唔好諗咁多，成日都諗我哋為選舉！」葉劉仲請企喺佢身邊、需要面對年底區議會選舉的嘅新民黨副主席、沙田區區議員潘國山回應，派錢係咪同選舉有關，潘話喎：「點會有直接關係呢？」佢又話，派錢「令市民開心」，唔知佢係咪對自己或者黨友嘅選情都好擔心呢？
有市民曾在網上揚言，即使政府派錢降溫，會用呢筆錢購買抗爭物資，葉劉話喎，唔相信會有很多人攞錢去買頭盔和盾牌。咁政府快啲派錢啦，派完咪知市民會唔會攞政府啲錢去買物資囉。