金球獎上屆由莫迪歷攞，之前10年就係美斯同基斯坦奴朗拿度瓜分，對上一個後衞拎金球獎，已經係2006年嘅簡拿華路，今屆大熱終於到中堅！效力利物浦嘅華基爾雲迪積克（VVD）講明想攞獎，等後衞可以一吐烏氣。
紅軍上季雖然贏唔到英超，不過歐聯稱王，而VVD喺決賽對熱刺成為MVP，又當選英格蘭球員先生，甚至係紅軍隊內選出嘅上季最佳球員，佢嘅表現已經得到球迷認同，而作為荷蘭隊長，28歲嘅VVD都領軍入咗歐國聯決賽，只係輸咗畀葡萄牙。
謙稱金球獎投美斯
喺美斯輸埋美洲盃後，VVD就成為金球獎頂頭大熱，根據《天空博彩》佢賠率係1.67倍，次熱美斯就2.2倍，其他人都係陪跑，第3熱已經係13倍嘅C朗，而VVD嘅紅軍隊友艾利臣比加就以17倍排第4。VVD話：「假如大家認為我可以贏金球獎，當然係我嘅榮幸。我認同上季我係踢得好，家陣我會集中精力應付新季，希望比上季更好。我明白呢個獎通常係前鋒或者10號仔拎，因為佢哋比較有吸引力，但家陣係時候改變。」
強烈譴責西維爾茅王
金球獎年尾先頒，身為荷蘭隊長，VVD都有投票權，佢就好謙虛話一定會投五屆得主美斯：「美斯係世上最好球員，所以我唔敢去諗自己得獎，當然如果贏到就一定會接受。」VVD贏金球獎機會絕對唔細，不過紅軍季前就一般般啦，星期日喺美國波士頓友賽西維爾，VVD今季首次幫紅軍打正選，不過紅軍37分鐘俾西維爾前鋒洛尼圖率先破網，雖然完半場前靠奧歷治追平，兼西維爾後防基拿隆76分鐘粗暴踢傷紅軍小將拿路斯被逐，但西維爾都靠普素絕殺贏2:1，紅軍嘅美國之旅連輸兩場。
至於拿路斯被踢傷後要由擔架抬離場，嗰陣右腳仲要着埋保護套同撐拐杖，好彩領隊高路普話初步檢查傷得唔嚴重︰「佢算夠運，當然我哋要再檢查。」占士米拿就譴責基拿隆可恥，VVD亦都指摘基拿隆心地唔好，結果基拿隆就喺社交網站同拿路斯、紅軍道歉。