建制派傳來新出爐的文宣，原文甚長，左丁山看後轉發給一位年輕人看，他看後回應云：「老人家寫的，太out了，誰要看。」
甚麼內容是out？年輕人引內容舉例：「但當有一日，你走在異國他鄉的街頭，聽到當地人歧視的恥笑，回憶起被斥搞亂的香港，想起遠方的親人，霎時百般滋味在心頭，雙眼不由得佈滿淚水……」這是上世紀六七十年代的文青筆法，今天上街的是千禧代，完全不能與這些文字connect。林鄭競選時的一個口號是We Connect，到了今時今日變成We Disconnect！文宣又云：「……不過你嘅人生會無咗沙田新城市廣場、Element、觀塘APM、旺角新世紀廣場、銅鑼灣世貿中心、東港城、大埔超級城、葵芳新都會廣場，、元朗Yoho Mall……」更令年輕人大笑：「除咗新城市廣場，其他地方一年唔會去一次，Element咁貴，我哋行入去就覺得自己寒酸，講嚟做乜。」不同地區青年或去不同商場，但在上水的青年人，也未必會常逛沙田新城市。文宣再說：「就等於杯葛TVB廣告客戶一樣，連老麥、翠華、KFC都唔好食，可口可樂、藍妹都唔好飲，更加唔好幫襯滙豐、恒生、渣打……」這一段令人不明所以，年輕人飲藍妹啤酒？連左丁山都覺得係老餅先至飲藍妹，左丁山在餐廳見好多年輕人飲嘅係日本梅酒加冰。
老嘢如左丁山就睇得明呢段長長嘲諷香港青年（上街青年）嘅意思，但年輕人根本唔係嗰套，網絡世界青年點會仲講老事物噃，最後，年輕人傳來一幅圖片作回覆（見網上插圖），一位黑人側頭露齒而笑，左右各有三個問號？？？左丁山睇咗，不明所以，問點解，佢話係meme，搞到左丁山要立即上網查究，原來係網絡爆紅事物咁解，譯做「模因」或迷因。老一輩即是老一輩，要靠年輕人解畫先至略明所以。建制派文宣寫手即使文筆蓋世，挖盡心思寫文稿然後叫藍絲瘋狂廣發，恐怕都難敵meme。葉劉痛罵政府新聞署唔識網絡不無道理，但葉老太又識幾多呢？佢成日講史丹福，不如向史丹福二三年班學生請教網絡入門啦。
星期六睇電視轉播，建制派在金鐘辦「守護香港」，有譚惠珠、梁愛詩上台發言，嗌口號，軟弱無力，真係老了，大嗌都冇聲。麟伯現在唱歌，都識得避開高音啦，大台上，一個年輕人都冇，可見建制派與年輕人有極大鴻溝。林鄭月娥睇唔睇得到問題所在呀？譚惠珠還在講：「你哋買唔到樓……」，唔怪得年輕人會回報以meme。