羅仲謙和楊怡在香港拍劇定情，至今結婚三年多，男方近年奔走內地賺錢養家，夫妻經常分隔異地，令生B計劃講足三年都未有聲氣。近日羅仲謙鐵定返港停留拍劇，決心陪伴太太努力造人，希望早日迎接家庭新成員。
羅仲謙近日為導盲犬電影《小Q》宣傳，戲中他飾演導盲犬訓練員，遇上演視障人士的任達華和犬隻相處的感人故事。為了表現更專業，羅仲謙開拍前要到導盲犬協會接受特訓，由旁觀者到親自訓練犬隻，再接觸寄養家庭，每個步驟都好深刻。他和任達華戲份最多，作為訓練專員面對抗拒導盲犬的任達華，要硬食對方不少暴躁脾氣。
任達華好前輩
羅仲謙一直視任達華為偶像，出道時第一套電影《阿嫂》已遇上對方，但當時戲份不多，今次才有機會正面接觸，他說：「華哥都可能唔記得咗我，我唔係新人，入行十幾年，而且華哥唔會畀壓力周邊人，大家為件事，唔會因為後輩而恰你，係好前輩好榜樣。」任達華是大眾心目中型男，羅仲謙同樣被這份魅力吸引：「個人keep得好，家庭美滿，事業得意，感覺上事業有成，又冇爭名逐利之心，唔覺得佢係乜都要贏人，你話幾難拿揑，我有華哥六、七成都好開心。」
自認非浪漫男
在內地發展多年，羅仲謙和楊怡聚少離多，要維繫感情雙方都有付出，他自認並非浪漫男：「太太係好成熟女性，當然有撒嬌時候，但自己要識做，我一啲都唔浪漫，追佢時就浪漫，𠵱家兩夫妻冇以前咁刻骨銘心。兩公婆婚姻冇100分圓滿，一定有高低潮，大家明白呢個道理就唔會專登去追求完美，唔畀對方壓力係最舒服關係。」
羅仲謙為楊怡心繫香港，近月會返港停留拍劇兼造人，他說：「一直冇話將重心放內地定香港，有機會就去做，對我嚟講冇得選擇咁多，華哥呢啲級數就可以選擇箒，我呢啲叫拼搏中。」經過近年積極搏殺，他在內地巿場算站穩腳，但他坦言：「始終唔可以離家太遠，同埋一直同太太計劃生小朋友，但一直只計劃，冇實行，今次專登安排返香港工作，可以一箭雙鵰。」又透露和太太已經做好準備，他笑說：「呢排佢會留喺屋企做吓運動，上網購物。」
撰文：卓寶花
攝影：陳俊強
化妝：Leo Tam of Annie G Chan
髮型：Jan Chiu of PP IL Colpo
場地提供：Studio King影樓王