「反送中」運動遍地開花，連港鐵車廂都出現仿地鐵告示嘅反修例標語貼紙！噚日有喺facebook分享多張地鐵入面影嘅相，八方最初覺得冇乜特別，點解要影地鐵車門？後來睇真啲，原來網民係分享多張反修例標語貼紙圖片，設計到同地鐵列車入面提示乘客小心安全以及讓座等等嘅貼紙標語，幾乎一模一樣！
圖案字樣似到足
其中貼咗喺港鐵列車車門上面貼紙，上面寫住「請收回暴動性」、「請勿送中」、「請立即釋放所有抗爭者」，連標貼上面嘅圖樣，亦同港鐵官方標貼相似，發帖網民笑言：「無縫融入and it's everywhere」，唔少網民都喺帖文留言話：「毫無違和感」，又問「有沒有成立獨立調查委員會？」有關圖片其後在facebook廣傳，短短4個鐘已有逾7,600人讚好。