作曲人徐繼宗擔任音樂創作超過20年，98年開始為歌手作曲，筆下曾替劉德華、容祖兒等天王天后寫出《十七歲》、《心淡》等作品。為了下一代，年多前決定舉家移民加拿大的他，安頓妻兒後，從此成為「太空人」，回港繼續追尋音樂夢想，最近更推出個人單曲，唱出其寫照。
從幕後走到幕前拋頭露面，徐繼宗只為一個原因──圓夢。徐繼宗日前在觀塘接受訪問，他說：「呢個idea其實十年前已經有，但當時要忙搵食、教音樂冇時間諗，直到𠵱家發現年紀唔細，趁仲有精神，仲有團火，做一啲自己想做嘅嘢。」單曲名《永遠有選擇》，除了是他的寫照外，放在任何人身上都可以：「好多時以為冇路行冇得揀，其實選擇永遠喺度，有時會好驚做錯選擇，正如兩年前去諗究竟移唔移民，首歌就係記錄當時嘅心情，由細到大我哋都充滿好多選擇，讀書、搵工、搵女朋友，你以為當時做錯咗，𠵱家望番回頭睇，其實冇乜嘢。」
唱歌曾怕被笑
徐繼宗坦言唱歌不會有回報，能夠得到家人的支持最為重要，幸運地有太太分憂：「以前都會諗出嚟唱歌會唔會畀人笑，𠵱家人大咗，唔會理呢啲說話。」由幕後走到幕前後，徐繼宗認為分別不大：「我起初都以為會，但結果唔係，其實我一路都有唱demo，亦有幫唔同歌手演唱會做和音，其實都算半幕前。」近年曾參與張敬軒的演唱會工作。
翻唱要有特色
多年來創作過不少作品，徐繼宗可會翻唱自己舊作？他說：「我起初有諗過，但後來覺得既然啲歌已經成咗名，你一定要唱得好過佢或者有特色過佢，否則就冇乜意義，但有啲demo或者可考慮攞番嚟唱。」
撰文：曹家誠
攝影：仇志德
化妝：Tinnie Leung