早前美洲盃季軍戰，阿根廷球星美斯喺比賽度同智利隊長加利美度發生衝突雙雙領紅，雖然阿根廷最後以2:1擊敗對手獲得季軍，但賽後美斯拒絕出席頒獎禮，仲鬧爆賽會同球證貪污腐敗，搞到有傳話美斯最嚴重會俾南美足總停賽兩年。不過據阿根廷傳媒報道，阿根廷足總上星期六交咗份文件畀南美足總紀律委員會，當中包含咗美斯嘅個人道歉信。
美斯喺信度話，當時佢話南美足總貪污腐敗，並冇指名道姓，又承認自己當時只係「一時火遮眼」；阿根廷傳媒又話，美斯最終只會接受警告同罰款，但佢同阿根廷足總都唔會接受對美斯最多兩年嘅停賽處分，所以阿根廷足總希望透過封道歉信，令南美足總唔好罰得咁重。
不過南美足總早前企硬，仲力數美斯嘅言論係「對賽事、所有球員以至南美足總數以百計專業人士唔尊重」。南美足總會喺日內決定，會唔會取消美斯當日嘅紅牌，同佢賽後言論嘅處分。
至於美斯效力嘅巴塞隆拿，最近就同贊助商德國某A字頭汽車品牌，喺上月尾結束咗13年嘅合作關係，美斯在內嘅一眾球星，要喺三個星期內還車！