本欄講過，外電講過，因「逃犯條例」，一啲香港有錢人流動資金轉移去新加坡。點知新加坡金管局突然警告或勸喻新加坡資嘅銀行如星展、華僑等不得在香港搶存款，不能趁香港有危機就郁手。路透引述新加坡金管局呢段新聞，幾位老友睇完，議論紛紛，究竟有冇香港資金流向新加坡㗎？
香港有幾間新加坡銀行，最大係星展，然後係華僑銀行（OCBC），華僑旗下有一間華僑永亨，又有一間旗下私人銀行叫做「新加坡銀行」（Bank of Singapore），新加坡三大銀行之一嘅大華銀行（UOB）在香港亦有分行幾十年咁耐。左丁山1982年第一次買樓就靠上司介紹去UOB借OD（透支）及P/N（短期貸款）嚟湊夠按揭首期，一直感恩。
呢幾間銀行有冇主動向私人銀行客戶推銷新加坡呢？真係好難講，左丁山問過一位在「新資」銀行辦事嘅職員，佢答得妙：「冇冇，上頭唔鼓勵，我地好守規矩。不過倘若客戶主動問到在新加坡開一個戶口，我又冇理由唔為熟客服務嘅啫。」咪係囉，香港客戶如主動要求，銀行素來提供優良服務，點會托手踭啫。此外，除咗新資銀行，在新加坡有過百年營業經驗嘅匯豐渣打，唔通會不迎合客戶需要咩。
彭博講得夠含蓄，指不少客戶並未真正動起來，只不過係設定渠道，必要時先至郁。乜意思呀？大家去過銀行開過外幣戶口都知，要錄音、要辦手續，先存入一千幾百外幣，暫時唔郁個戶口，咁咪叫做預設渠道囉。林鄭說「送中條例」暫緩，話壽終正寢咯，屬停住先，不急於一時，到突然間「送中條例」借屍還魂（TVB如突然有大量廣告宣揚香江不是逃犯天堂，就是還魂預兆），就可以即時轉錢入新加坡戶口啦。財爺話到目前為止未見到香港有資金外流，確實係因為目前大規模走資可以暫緩，但未撤回，而且未dead，將來如何發展下去就要睇林鄭。依家網上流傳不同版本，警方會議記錄，CP（警務處長）講到政治事件難以由警方解決！梗係啦，林鄭點可以一味擺警察上枱嘅啫，特首會同行政會議才是香港最高決策機關，目前是否已癱瘓咗？如果係，就唔該大洗牌換人；如果唔係，做乜沉默似金，拿不出解決方案來？最高領導如此inept，難怪新加坡金管局代為發聲，叫新資銀行不要乘人之危了，香港人好冇面。