李璧琦（Becky）和拍拖五年的圈外男友蘇銘熙（Adrian），昨日在半山堅道浸信會舉行婚禮。一對新人行禮前先會見傳媒才行禮，圈中好友歐錦棠、陸浩明（6號）和馬蹄露等都有前來觀禮。新娘子Becky穿上一襲中門大開的性感婚紗，老公則穿上白色禮服，在台前切蛋糕、合巹交杯和咀嘴。
影全家福
婚禮於教堂以基督教形式進行，沒有進行所有傳統中式禮儀，Becky說：「所有上頭、過大禮同接新娘我哋都冇做到，因為屋企人特登喺外國飛返嚟，所以今朝就趁所有屋企人喺度時一齊影全家福，諗番上一次影全家福已經係21年前，所以想喺今日大日子去做。」為籌備婚禮，Becky和老公笑言前晚只睡幾小時，Becky稱：「由3月決定結婚，4月影相，5月通知大家到今日，成件事真係mission impossible，真係要好多謝所有幫手嘅朋友。」
講到婚禮誓詞，Becky表示已經準備好：「其實喺平常相處時候，已經一點一滴有個草稿喺心入面。」 問到在講誓詞期間，可會感動到落淚兼忘記誓詞？她笑說 ：「我冇寫低，經你哋咁講我都怕自己會唔記得，但我有準備定紙巾。」
問到婚後是否即進行造人計劃？新郎Adrian表示：「暫時未諗，想過下二人世界先。」同時蜜月地點也還未決定。問到Becky給老公打多少分？她說：「我會畀130分，因為我覺得自己得70分，我哋兩個加埋就圓滿啦。」
六號取經
六號表示，雖然跟Becky無合作過但專程來觀禮：「我同女朋友都係教徒，一直都好希望喺教堂行禮，今日嚟可以取吓經。」又表示有計劃跟女友拉埋天窗，但未知何時，求婚戒指仍未準備好。
採訪：曹家誠
攝影：陳慧安