張慧儀說，她常常對養子Hanson說的是，「呢個家係我哋兩個嘅，少一個都不成家。」
06年在北京孤兒院遇上Hanson，她說這是解釋不到的緣份，自此Hanson就陪着她穿州過省，由北京到廣西再去廣州；香港馬拉再回香港……患有先天性心臟病的Hanson去年在港接受了一個大手術，現在仍要定期覆診。
訪問這天，Hanson都有陪着母親，他會自己坐到另一旁不打擾媽媽受訪。張慧儀說：「希望佢快啲大個獨立啲，到佢都可以照顧我就更好喇！最緊要都係我哋兩個喺埋一齊。」
兩母子總是形影不離，十多年來為了Hanson的醫藥費，辛苦嗎？「又唔會覺得辛苦嘅，呢個係生活囉！」因為Hanson，張慧儀看到了自己的價值，「我醒覺原來我唔係九十年代喺娛樂圈拍性感戲嗰個張慧儀，原來我可以咁堅強……」
當年演過《真情》、拍過王晶《強姦3》，現在眼前這個不一樣的張慧儀，比真情更真情。
撰文：文嘉龍
攝影：陳慧安
我潛意識有種母性
Hanson去年的心臟問題越見嚴重，在醫生的建議下接受手術，以人工導管將上下腔靜脈連接至肺動脈，手術歷時近十小時。事隔大半年，張慧儀說：「唔係話完全康復，但比之前好好多。呢個手術可以幫到佢血嘅含氧去返正常，正常情況係八十幾九十幾，之前佢得七十一、七十二，所以𠵱家叫做比之前好。呢個case唔會話根治好番晒，𠵱家覆診會密啲，每三個月就要做一次覆診，要確保佢個肝、腎同肺壓正常，咁就可以健康正常成長！」
多年來為Hanson的醫藥費，張慧儀可謂負擔不小。「好坦白講如果我哋唔係喺政府醫院（瑪麗），唔係有Hanson呢個團隊幫佢，講真係唔止呢個數（過百萬），呢個係一個龐大嘅手術費！」
張慧儀說，曾經問過自己，如果冇Hanson出現，會點呢？「我有時同Hanson傾偈，你使咗我好多錢㗎，但係當我講完呢番對白，我自己會諗如果冇佢，可能我亦都唔會搵到呢啲錢，因為我或者會冇咁積極，所以換一個角度，我相信佢係我一個推動力。」
06年到北京孤兒院做義工的張慧儀，那時候完全沒有想過自己會收養Hanson，就在一次兩人外出食飯時，當時只得3歲的Hanson叫了她一聲「媽媽」，觸動了張慧儀的母性。
「或者我潛意識入面有種母性，我諗女人到咗某一個年齡，潛意識係會有呢樣嘢。佢嗌咗我一聲媽媽，開始咗我哋嘅母子之旅。我冇計劃㗎，所以我相信係上天嘅安排同緣份，點解我見到佢之後我咁義無反顧、我咁盡心盡力，我自己都解釋唔到，好神奇。」
有說張慧儀之前遇到一個北京富商，還到談婚論嫁階段，最後對方接受不了Hanson，感情無疾而終。「係有其事嘅，我諗亦都係緣份啦，因為我覺得佢未必咁接受Hanson，佢唔係話唔理，佢係話Hanson係咪可以返馬拉，俾我媽媽照顧，經濟錢銀可以係我哋照顧，咁我覺得呢個唔係我收養佢返嚟個意義囉！對方又唔係錯嘅，每個人都有選擇權利。」
我唔覺得有乜嘢犧牲
雖然張慧儀與北京富商結不成婚，但兩人仍維持朋友關係，「到今日我哋都仲係朋友，有時大家互相問候，佢都話我真係唔識諗，同埋話Hanson大個咗之後一定要好好孝順我，因為我為Hanson奉獻咗自己好多嘢，咁我就問佢，你覺得我奉獻咗啲乜？佢話就係你個人幸福都奉獻咗啦！」
算是為Hanson犧牲幸福？「我又唔覺喎，我真係解釋唔到同呢個細路仔嘅感情咁深，同埋講真，我對天對地講，我冇覺得Hanson嘅出現係斷送咗我嘅幸福，我只係覺得，佢幫我過濾咗一啲係咪真係適合我嘅人啫！如果一個真係適合我嘅人，佢係唔會介意Hanson係點，所以我唔覺得我有乜嘢犧牲囉！」
03年張慧儀決意到北京，其實也是為了一段情。當年她與拉丁舞王未婚夫霍紹裘感情生變，男方更出拳打傷張慧儀臉部，張慧儀在母親陪同下召開記者會，表示與未婚夫緣盡。其後張慧儀隻身到北京轉行營商。
「呢件事某程度上對我有打擊，令到我行出街，我見到人交頭接耳，我就彷彿好似覺得人哋係議論緊我呢件事，令到我精神負擔好重，所以我想離開香港，我只係想放一個悠長假期，我更加發夢都估唔到，我一去就係十年，亦都諗唔到我去咗北京之後，有一個新嘅生活，有咗新嘅Hanson。我冇諗過退出娛樂圈，我只係想行開吓，但係離開咗香港去咗內地，發現自己對娛樂圈嗰個心力好似冇咗，事已至此命運安排，我係咪可以重新嚟過，有一個新嘅生活。」
張慧儀說自己一個人在北京，初時的日子並不好過，「我係93年嚟香港（由馬來西亞），我離開嗰時係03年，十年喇，呢十年我每日嘅大部份時間都喺片場度過，我對出面嘅世界好陌生，我有好多嘢唔識，我應該畀機會自己去學吓第二啲嘢，開始另一種生活，試吓自己做生意。」
由最初的果醬生意，到後期代理各種健康食品、燕窩禮品，再到代理馬來西亞的白咖啡，從北京到廣西再到廣州，穿州過省都有Hanson相伴。「Hanson嘅學費係我第一個負擔，帶佢返嚟睇醫生嘅醫療費都貴，由嗰時開始我就覺得果醬（生意）不足以維持我哋嘅生活，我就開始代理其他產品。我突然間決定帶佢去廣州，嗰陣時真係最艱難，我又零朋友，連我自己可以住邊我都冇概念，又帶住一個細路。」
我承認我身材係好好
為了成功sell出產品，張慧儀不放過任何接觸客戶機會，當然亦有難受時候，「𠵱家講返轉頭好似好簡單，當你去到一個新嘅城市要過新嘅生活，係要有歸零嘅心態去做，當然會遇到一啲好嘅客，亦會遇到一啲尖銳啲嘅客，佢會畀說話你聽，譬如護膚嘅產品，我要做一啲測試話畀佢聽點樣好，我好記得呢個客嘅眼神同語氣，佢話你明星嚟㗎喎，你做呢啲呀？佢嘅嘴臉我睇完嗰一剎那好難受，跟住我同自己講，點解呢個人品德咁差呢？會唔會我當日在娛樂圈意氣風發嘅時候，我有冇畀過呢個面口人哋睇呢？」
今年48歲的張慧儀，來自馬來西亞怡保，13歲就參加妙齡公主選美比賽，92年更得馬來西亞怡保區華裔小姐冠軍，93年來港參選華姐而正式入行，除了演出《真情》的彩瑤夠經典，她在王晶的《強姦3OL誘惑》亦奠下性感女郎的稱號。
「三級都有好多種，我嘅三級係大膽、唔係全裸，我從來冇全裸過，我係好大膽好性感啫！我覺得我好慶幸有試過，因為唔同年紀應該嘗試唔同嘅嘢，嗰時後生係可以性感，𠵱家你叫我性感我都做唔出喇，亦都唔會有人睇！我承認，呢樣嘢我又唔謙卑，我身材係好好嘅，我留低一啲美麗嘅倩影同最美麗嗰一刻，𠵱家你叫我再着件三點式，就算我身材冇變冇肥，我都覺得唔適合啦！但係後生唔同吖嘛，我就係要show我係好靚，嗰時我成日都覺得自己好靚，哈哈哈！」
馬來西亞、香港、北京、廣西，多年間遊走多處，張慧儀說：「我條命真係要奔奔波波！」何處是吾家？「絕對係馬來西亞同香港，因為香港對我好有歸屬感，馬來西亞就係我成長地方，同埋我屋企人到𠵱家都仲喺度，香港係我第二個家，我93年嚟香港真係一個初出茅廬嘅小朋友，香港令我好有歸屬感，同埋我嘅事業、我遇到嘅connection都係喺香港。」
當初選擇隻身到北京，只因想去一個冇人識的地方，「我話畀自己聽我唔想去外國，我都係一個傳統嘅華人，我一定要食返啲chinese food，我又唔想返馬拉喎，因為呢件新聞（被未婚夫打）喺馬拉都有人知，我又唔想返去，我想去一啲華人嘅地方，最好冇乜人識我，嗰時網絡冇𠵱家咁發達，我拍嘅劇喺廣東省會睇到，但喺北方就唔會睇到，應該比較少，所以我就諗不如去北京啦，而且北京我未去過，唔知係咪因為Hanson喺北京呢，哈哈！」
真係乜都關Hanson事。
【後記】爆旋陀螺
媽媽接受訪問，Hanson就自己坐在另一旁，手中玩着他心愛的陀螺。將近16歲的Hanson正值青春期，剛見面時也有點害羞，但拍完照後就開始變得熟絡和熱情，他會教攝影師玩陀螺，又向記者說自己最愛《爆旋陀螺》，要儲齊一set，最愛是藍色和橙色的陀螺。
張慧儀說：「香港同馬拉對佢嚟講係兩個世界，馬拉生活就係純樸，但係佢好鍾意熱鬧，佢喺屋企有我爸爸，有我媽媽、我家姐我姊夫、我妹我妹夫、我細佬、我細佬屋企人，當然唔係一齊住，佢淨係同我阿爸阿媽住，但係會成日一齊食飯吖嘛大家，咁佢就好開心，佢好鍾意人多，地方又闊落，任佢跑任佢玩；返到嚟香港，佢又點解鍾意香港呢？香港玩具多，有玩具反斗城，怡保好似冇囉，咁香港就好玩啲！」
張家上下都錫到Hanson不得了，「我話你唔應該叫張晃維呀，改名叫張家寶啦，我哋張家嘅寶，個個都錫到佢燶！」
至於Hanson的寶，可能就是要儲齊一set，一個都不能少的陀螺。
場地提供：Spring Medical
