楊愛瑾（Miki）、洪卓立與余香凝昨日到銅鑼灣出席卡通英雄活動。已為人母的Miki表示，經常留意不同商場的親子主題活動：「我自己成日上網睇吓有乜玩，因為暑假都冇安排哥哥學嘢，佢𠵱家兩歲多啲，最緊要有個空間畀佢跑，成個月去同一個地方都冇問題。」
要鬥智鬥力
Miki的細女現時剛滿四個月，她直言湊兩個小朋友非常勞累：「未試過咁辛苦，冇時間做自己嘢，除非朋友主動約我，如果唔係真係連朋友都冇乜點見。我盡量都親力親為，佢哋食嘅嘢多數都會自己買，不過冇工人姐姐又真係唔得。」她笑指從前連續拍19小時電影，翌日工作亦沒有問題：「可能𠵱家老咗，加上要同佢哋鬥智鬥力。以前出去開工，都係俾人照顧，𠵱家要同佢哋玩，仲要照顧佢哋，真係好攰。」Miki指哥哥很錫妹妹，經常對妹妹又錫又摸：「最搞笑哥哥以前唔食手指，見到妹妹食佢又食手指。」早前Miki與吳雨霏同日為寶寶舉行派對，令她們的好友鄧麗欣連走兩場，Miki說：「冇人投訴呀，香港人慣咗生活節奏咁急速㗎啦。」
另外，洪卓立直言自小最想成為蝙蝠俠：「佢又有錢，又有靚車，最緊要多女仔鍾意。」問他想有幾多女仔喜歡？洪卓立笑謂：「最好以百計啦，咁耐以嚟都係得幾個女仔鍾意我咋喎。我記得中二、三初戀嗰陣，拍咗一個月發覺自己唔係真係鍾意，就分咗手。」
採訪、攝影：盧妹