話咁快又一年喇！選美比賽面試最好睇就係班女仔點樣show off自己，入唔入到圍都唔緊要，最起碼博到做一日紙上明星吖！話時話我姐匙都見過唔少選美姐姐，正所謂「一樣米養百樣人」，個個有唔同性格，唔緊要，但做得選美冠軍，做人都要有品。
事關我有位行家朋友，傾開點睇啲選美姐姐時，佢就同我呻咗單嘢。話說當年行家朋友初入行時，有乜嘢order都要照做。有次佢臨危受命要幫過氣選美姐「叻姐」影輯靚女相訪問，服裝、地點都安排妥當。點知呢位叻姐，本身已經唔係一線花旦，只係啲二、三線奀星，竟然耍大牌。叻姐喺約定嘅訪問時間，先係遲到一粒鐘，繼而不滿影相地點難搵，再埋怨泊車唔方便，可是當日取景嘅地點係中環蘭桂坊某餐廳，中環難泊車唔出奇，咁佢可以坐的士。
之後叻姐對公關借嚟嘅衫裙，藐藐嘴唔多鍾意，仲要冇準備啲打底衫褲，總之樣樣都唔合佢心水，處處挑剔，搞到我位行家朋友好鬼嬲，但礙於佢當時初出茅廬，惟有全程啞忍。事隔多年，呢位叻姐已經轉行開咗幾間舖，好聽啲就叫做老闆，唔好聽就係打雜，掉番轉受啲顧客氣，真係大快人心。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。