41歲嘅法國名宿查斯古特喺意大利因為醉駕搞到「一身蟻」，呢位前祖雲達斯球星喺意大利都靈唔肯同警方合作，仲喺接受酒精呼氣測試時「爆粗」鬧警察。根據英國《太陽報》消息，查斯古特同友人出席完一個品酒會之後，就一齊揸車返去都靈。點知半路就俾警察截停咗，仲要佢「吹波仔」，飲完酒仲揸車嘅查斯古特就梗係唔肯。呢位法國名宿唔合作仲鬧番警察轉頭：「你呢啲窮人，連2,000歐元(約18,000港元)都賺唔到，你係失敗者！」最後仲問候埋人哋娘親，喺雙方擾攘咗一個鐘頭之後，查斯古特最終都係要「吹波仔」，結果超標咗成三倍，最後唔單止要罰錢，連車牌都俾人吊銷咗。