【香港書展2019】李家鼎（鼎爺）昨日與黃淑儀出席灣仔書展的烹飪講座，鼎爺之前在無綫節目《我的寵物》教煮狗食，不過他在第一集教煮牛肉時揚言要落少少鹽「吊味」，第二集煮雞骨、第三集還落油煎魚，立即惹來一眾愛護動物的網民負評，力斥節目有誤導之嫌。獸醫更指當中提供的資訊錯誤，通訊事務管理局（通訊局）截至前日共收到164宗相關投訴。
世界冇完美
對於被網民指自己在電視節目中教的寵物食譜有誤導及不實成份，問鼎爺可有留意網民意見？他說：「我都唔係咁識字，冇時間睇，總之呢啲我唔講喇，今日淨係講啲人食嘅嘢。」可有為負評而不開心？鼎爺說：「鬧我我都開心，即係你有睇我節目啦，好似我私房菜啲客咁，無論佢彈又好、讚又好，我都咁開心，因為有人鬧先至會進步，都會檢討係唔係自己唔好，唔好咪改良，呢個世界冇完美，盡量做好自己。」
交流靠互彈
通訊局至今收到164宗投訴，鼎爺表示不知情，公司亦沒有找他傾偈，當記者想再問鼎爺之後再煮有關動物菜式的問題時，鼎爺即落閘：「總之今日我淨係講人食嘅嘢，動物食嗰啲，我唔講喇。」
同場的黃淑儀也是烹飪高手，問鼎爺平時可會與對方交流心得？他說：「我哋嘅交流就係互相彈對方啲嘢，都識咗幾十年，講笑箒，我都欣賞佢嘅做法，各師各法，一齊研究吓，集合我哋唔同好處做一個新嘅菜式出嚟都得。」至於互相批評時有否動真火？鼎爺笑言：「我嬲當年追佢唔睬我，講笑，當年我都當佢係女徒弟，佢好爽直又尊重我，我教佢好多嘢都做到，我好開心。」是否有很多人想拜師學藝？鼎爺說：「如果唔識問我，我會將步驟、用乜材料講畀你聽，唔好搞搞震，真心係學咪話畀你知，冇話收唔收徒弟。」
採訪：盧妹
攝影：陳慧安
