尼馬想離開現效力球會巴黎聖日耳門（PSG）已經唔係秘密。巴塞隆拿似乎真係好想呢位浪子回頭，來季回家再合作，但自從上季結束後一直傳過唔少巴塞提出唔同交易方案，PSG都不為所動。據報巴塞又有新諗頭，既然提出嘅球員交易籌碼PSG唔滿意，索性拎一堆出嚟畀你揀，開出一億歐元（約8.8億港元）轉會費條件，再將陣中6名球員畀PSG任揀其中2位，務求換到尼馬返嚟。
順便減磅免觸犯FFP
近個幾月以嚟傳過唔少巴塞開出嘅尼馬交易方案，先有菲臘比古天奴加轉會費，之後有古天奴或奧士文尼迪比利再加錢，近日又有傳聞，指巴塞開出以5,000萬歐元再加古天奴同埋拿傑迪錫，再到日前又有另一個方案，話巴塞先喺來季借用尼馬，到明夏再強制性購買，等巴塞唔使咁易觸犯歐洲足協財政公平競技條例（FFP），亦可以等銀根鬆動啲先科水。
西班牙傳媒喺周四報道，巴塞隆拿就重簽27歲嘅尼馬正式向PSG提出收購，報價一億歐元轉會費，再列出一份六人名單，包括有古天奴、迪比利、馬爾甘、拿傑迪錫、尼爾遜施美度同埋淨番一位未被披露名字嘅球員，畀PSG可以喺呢6位球員中揀2個做交易籌碼。
PSG想現兜兜收錢
據悉PSG其實唔介意將已經冇心留隊嘅尼馬賣走，但傾向現兜兜收錢賣人，唔涉及球員填數，最低要求係可以收返兩年前向巴塞買尼馬嘅2.2億歐元。不過巴塞喺今夏已經使大咗，由馬德里體育會以1.2億歐元收購基沙文，再使多2、3個億實過唔到FFP，所以一定要減低重簽尼馬嘅轉會費金額支出，順便清冗員，如意算盤打唔打得響，仲要睇PSG落唔落搭。巴塞為咗簽尼馬可謂不惜一切，就算PSG同意其實對球會未必係好事，試想你係巴塞方案6人裏面冇被揀到嗰4位，仲有冇心機為佢哋效命？
有傳尼馬已經同PSG攤牌，幾經擾攘後終於喺幾日前返球會報道，睇佢同一班隊友集訓有講有笑，但仲會留喺PSG幾耐實在係未知數。球會新任體育總監李安納度早前都表明，如何有合適報價尼馬隨時走得，連教練杜曹都公開承認，早喺美洲盃前已知道尼馬想走人。