正喺美國南灣備戰友賽舊東家多蒙特嘅利物浦領隊高路普，抽空出席當地聖母大學座談會。講到未同紅軍傾續約時，佢話唔使急，首先一定會履行呢三年合約，仲話自己難以想像有一日會離開紅軍。雖然高路普未同利物浦正式傾續約，但佢喺言談間一樣流露出對紅軍嘅愛，強調自己唔會輕易離開：「我唔可以想像有一日唔再係利物浦領隊，但呢樣唔重要，事實係我仲喺呢度，100%為球隊付出，然後會睇睇有幾長，無論會唔會展開續約談判，或者實際上會點樣……我將會喺呢三年內遵守我嘅合約，然後再簽約。我有三年時間，一切都好好，我鍾意呢支球隊。」另外，講到嚟季英超爭標形勢，高路普堅稱就算紅軍上季贏得歐聯，但曼城喺聯賽仍係大熱門。