姚莉與張露生前感情要好，張露兒子杜德偉昨日接受《蘋果》訪問表示曾因母親關係見過對方幾次，而與姚莉相識多年的夏丹則指每次探望對方也會感到心痛。
杜德偉︰「好可惜！我同佢見過幾次，印象中佢係一個好優美嘅老人家，好和善、好靚，有啲女人越老越靚，姚莉姐係屬於呢種。」
劉韻︰「我病呀，入咗醫院割膽石，今日啱啱出院。若果知道喪禮安排就通知我。」
夏丹︰「已經知道喇，走咗都好，我睇到佢咁病，瞓喺度好辛苦！次次去探佢，我心痛死。」
陳永業︰「我同姚莉姐喺1990年認識，跟住一見如故，成為好朋友。Patti Page喺90年代尾嚟香港開演唱會，請咗姚莉姐出席記者會，佢變咗小fans，好興奮、開心。」
洪朝豐︰「對上嘅消息知道佢行動唔方便，入咗老人院。姚莉姐姐心地好，又樂觀、開心，佢係基督徒，相信佢走嘅時候會好開心離開呢個地方。」
汪明荃︰「最記得姚莉姐姐唱嘅歌《玫瑰玫瑰我愛你》，佢唱過好多流行曲，對唱片界好有貢獻。90幾歲係笑喪，希望佢安息。」