由謝拉特領軍嘅格拉斯哥流浪，周四喺歐霸盃外圍賽第一圈次回合，憑摩尼路斯「戴帽」，加上老將迪科爾也梅開二度，以6:0大炒直布羅陀球隊FC聖若瑟，兩回合合計贏10:0晉身第2圈。首回合作客已領先四球嘅格流，開賽三分鐘已由新兵艾里保射地波開紀錄，完半場前，摩里路斯憑角球將紀錄拉開。換邊後，呢位射手分別喺57分鐘射入12碼，同66分鐘撞射入網，個人連中三元。大局已定下，後備上陣嘅迪科爾再喺77同86分鐘連入2球，6:0大勝躋身第2圈。其餘大比數賽事仲有瑞超嘅馬模，次回合作客北愛爾蘭嘅巴利米納大勝4:0，兩回合贏11:0。另外兩支蘇超隊，鴨巴甸晉級，基爾馬諾克負康納斯碼頭出局。