洛杉磯銀河前鋒伊巴謙莫域經常自認係美職聯現時最佳球員，但最近有ESPN記者喺訪問入面反駁佢，質疑卡路士韋拿可能比佢更優秀時，伊巴馬上反擊。截至上輪，伊巴今季替銀河上陣16場入13球，但球隊目前只位列西岸第三，而卡路士韋拿帶領嘅FC洛杉磯就位居榜首，而且對方現時射入19球，比伊巴多六球。伊巴話：「到目前為止，如果呢個係佢嘅巔峯時期，佢目前幾大？29歲嘅佢喺美職聯踢波，當我29歲嗰時，我喺歐洲，呢個就係最大分別。」雖然伊巴資料唔多準確，卡路士韋拿已30歲，但伊巴30歲時仲喺意甲AC米蘭打滾，喺29歲時仲為AC米蘭拎到意甲錦標，難怪辯駁起上嚟記者都冇聲出。