正式開始亞洲之旅嘅英超勁旅車路士，禮拜五就喺日本橫濱同上季日職冠軍川崎前鋒友賽。遠道而嚟嘅車仔都可以話強陣出擊，中堅嘅大衛雷斯、中場佐真奴費路，同埋前鋒柏度洛迪古斯都悉數正選上陣，不過打咗半場都冇咩優勢可言，只能夠互交白卷。下半場車仔再換入埋基奧特、巴克利，同埋貴價新兵基斯甸普列錫，進攻係有啲改善，不過都係咬極唔入。相反對手前鋒86分鐘由巴西前鋒李安度達美奧接應隊友傳中，門前頂彈地波收死今場正選把關嘅老將韋利卡巴尼路，最終就以1:0擊敗車仔。而今場亦係車仔新帥林柏特上任以來首場敗仗，另外車仔開季3場友賽都係得1勝1和1負，睇嚟林伯仲有排執。嚟緊球隊將會留喺日本，下周二同西甲勁旅巴塞隆拿喺埼玉友賽。