新城市一役，商場變戰場，警隊全副武裝，戴晒豬嘴殺入商場開拖。一直是陸客掃貨基地，自由行還以為是華仔古天樂合拍戰狼吳京。個便衣冇委任證，肯定係拍緊戲啦。陸客與香港朋友重睇手機新聞片段，甚至認定，那隻斷指，是道具。做得幾逼真嘅，文青女遊客掩嘴偷笑。埋嚟睇埋嚟睇，邊有人係咁攤開隻斷指叫記者影相，傻嘅咩。咬人那個，照計成嘴血，但又冇喎，嘻嘻，好騎呢囉。女遊客認為商場天眼如果拍到，應該公開片段，千祈咪學傳媒咁，打晒格仔，失晒研究價值。喔，女遊客除了撐起香港零售業的半邊天，她們面對林鄭月娥強烈譴責的所謂暴力，依然一貫地嘻哈，貫徹網絡新世代作風，能力範圍內，少少惡搞威權，輕輕調侃建制，乖乖遠離五毛，自己的小確幸自己尋覓。
在反送中運動每一個戰場上，站到最前、食過六月彈七月椒的年輕港女，極速進化，商場女廁內不避諱大談新城市那一夜，「換咗係我被插，會咬斷佢一節手指咁便宜？」下文唔使形容都知，破口大罵抗爭者「自由西」的港警，萬一撞着升級剛烈港女，沙燕橋上，對峙隻揪，估吓邊個strike！