曾智華已達到財務自由，要數最成功的投資，都是跟政府有關，就是長線買入領展（823）及煤氣（003），分別升了9倍及3倍，「逢政府放出來的，一定要飛身買，買到佢盡！」
Luke Sir是公務員出身，深明公務員的弊病，做又三十六，唔做又三十六，因此2005年時，當年領匯（領展前身）上市，即是把公務員手上的工作轉為私人企業管理，雖然全港鬧爆政府無良，但他毫不猶豫買入。「當年上市，我喺傳媒範圍不停叫大家買買買。當時無一個財經演員睇到領展唔係一隻收息股，而係一隻爆發性增長股。我係公務員就知道，任何商品在公務員手上都『鑽石變玻璃』。」然而，領展升至現水平，Luke Sir建議大家不要入貨，除非回落至85左右水平才可買入。
不要沾手創板股及內企
Luke Sir年輕時曾任倫敦金經紀，亦試過在股海浮沉，他指港股2,000多隻股票，大部份是垃圾股，包括大部份創板股；另外內地企業亦盡量不要沾手，因內地的道德價值和監管跟香港非常不同，老闆可隨時無故因非禮或其他原因被拉，風險高。
「應揀同政府政策有關的股票，公用股有Guarantee profit，因為唔能夠畀佢冧，同埋呢類公司攞牌時，政府已清楚唔係古靈精怪先會發牌。」例如煤氣及港交所（388）。