48歲曾演展昭的亞視前小生甄志強，事業和愛情都經過高山低谷，近年信佛的他，面對過去一切都看化，明白一切知足常樂，並樂於用知名度和能力多行善回饋社會。日前他在道場受訪，自小學跆拳的他，往事湧上心頭，也不介意重提當年一段女尊男卑舊情，對象是年長23年的名媛趙金卿，兩人至今分手19年，小強表示甩拖後沒聯絡，希望舊愛身體健康。
撰文：比華利
攝影：沈健程
亞視前小生甄志強當年出道條件不錯，情關令演藝事業停步，他1998年爆出戀上年長23年的名媛趙金卿，兩人拍拖去ball，女尊男卑，他被形容為「二打六」，這段姊弟戀轟動一時，二人關係只維持兩年多。小強星途平平，選擇淡出幕前，北上深圳開茶餐廳，也試過到上海做生意，及至2016年回流香港發展，信佛的他創立「香港藝苗會」，大搞活動回饋社會。
放棄跆拳
小強日前接受《蘋果》專訪時說：「想盡能力給下一代同弱勢社群正能量。」小強擅打高爾夫球，幼時學跆拳道，更是黑帶高手，根據資料顯示，他於1989年更是香港跆拳道代表隊（中量級別）首席成員，同年底代表香港參加於韓國舉行的「第九屆世界跆拳道錦標賽」，最終16強止步。訪問當天興之所至，小強穿上跆拳服現身道場，在熟悉的環境勾起不少回憶，他跟師兄弟們切磋拳術，「記得當年15、16歲開始學，當時唔算細個學，筋冇咁鬆，𠵱家少練咗更事倍功半，以前一星期學三日，放學就去練。」小強當年選擇了演藝事業，放棄在跆拳道上繼續前行，「今日諗番都冇後悔，每個人喺唔同階段會接觸唔同嘢，每個人都會有唔同人生經歷。多謝亞視畀咗好多機會我，蕭笙、楊紹鴻同蕭建鏗等監製導演都係我伯樂，佢哋敬業樂業，好似一個大家庭。」
學佛放下
離開亞視，小強也曾入過無綫，離開時就淡出娛樂圈進軍搞飲食，先後在元朗和深圳開過茶餐廳，後來都結業。之後小強再把基地搬回香港，他說：「最初返嚟香港，我停咗一排，我係佛教徒，我做好多慈善探訪，行番出嚟，我對呢個城巿感覺有少少唔同，香港樓價好高，覺得呢度現實咗。」經過人生起跌，更珍惜現在擁有的一切，小強希望用自己能力作出貢獻：「有時賺錢係左手嚟右手去，中間搵個飯盒食。我以前好鍾意食海鮮，搵十蚊使七、八蚊，食得多海鮮，有一日去食白粥、油炸鬼仲開心。」知足常樂的他續說：「學佛明白放下，人到某階段『叮』一聲，我以前好火爆，𠵱家一笑置之，靜一靜，諗一諗，乜嘢都可以拋諸腦後，如果再嬲十年，就會十年唔開心，如果唔嬲，嗰十年可以好開心生活。」
回顧人生，小強也不介意被重提跟現年70歲趙金卿的一段情史，兩人轉眼已分手19年，小強說：「我都幾十歲，唔介意講番，我都十幾二十年冇見佢，希望佢身體健康，我哋曾經發展過一段唔知點解嘅愛情，過咗某段時間就無疾而終，年輕時係想有段轟轟烈烈嘅愛情，𠵱家希望將來可以搵到一段刻骨銘心嘅愛情。」