【士氣低落】
【本報訊】林鄭月娥政府堅拒回應民間五項反送中訴求，令處理反送中示威衝突的前線警務人員成為磨心。近日網上流傳多段疑為前線警務人員的錄音，眾口一詞爆粗鬧爆警隊高層處理反送中示威衝突部署失當，有人更在警署內部張貼警隊高層架構圖，並寫上「垃圾廢人 引咎辭職」。有資深警務人員坦承，警隊士氣史無前例地低落，甚至連警隊家屬士氣亦受打擊，「只有一哥（警務處長盧偉聰）提早退休，林鄭落台，先至可以平息警隊怨氣」。
記者：謝明明
近日網上流傳多段疑為前線警務人員的錄音，均不滿警隊管理層處理7.14沙田反送中示威衝突的部署，有疑似男警批評沙田警區指揮官麥劉慧敏部署失誤，「Crime（刑事部）喺新城市叫救命，麥劉慧敏DC STDIST（沙田警區指揮官）話唔好入去住，驚唔好睇，俾人詐型，嗌到第三次機先入，高層係咪有病！……佢之前未×做過唔×識做，係咁周圍打畀朋友問功課。你話有呢啲咁嘅高層恐唔恐怖，所以今日警方得到如此下場！大家真係要自求多福」。
另有疑似男警咆哮：「高層唔該清晰少少啦！你哋想點×樣呀？如果唔×拉人，就唔好叫啲伙記去死吖唔該！」
部署失誤 家屬士氣受打擊
有疑似女警更情緒失控，激動哭訴：「我真係好×嬲！乜×嘢世界？個伙記如果唔係記者保住佢，死×咗啦！嗚……嗚……打×完人全部上火車走，仲有冇王法呀？警察乜×都唔×拉，助長佢哋一次又一次咁出嚟，嗚……嗚……我真係嬲到頂唔×順呀！乜×嘢世界呀？×你老母臭×！越諗越×嬲呀！乜×嘢高層嚟㗎！×你哋班老母！」
網上更流傳一張疑是警署壁報板照片，板上有警務處高層架構圖，有人在圖上寫上「垃圾廢人 引咎辭職」。
有資深警務人員直指，7.14沙田警民衝突，警方部署失誤，「根本唔應該入商場打巷戰，只會令前線伙記進退失據」，造成多名警員受傷，他形容警隊士氣史無前例地低落，甚至連警隊家屬士氣亦受打擊，「老婆仔女都質疑點解警隊高層推前線伙記送死」。他慨嘆現時擁有實戰處理示威暴亂經驗的警隊管理層「買少見少」。他直指：「（前線人員）冇人撐一哥（盧偉聰），只有一哥提早退休，林鄭落台，先至可以平息警隊怨氣」。
警方回應查詢時表示，警隊管理層一如既往與職方協會保持溝通，了解員工關注事項，並作出跟進。警隊為人員提供支援，處理人員的情緒危機或其他壓力問題，亦設有「心聆團隊」和「心聆熱線」，向人員提供朋輩輔導。
學者：要林鄭一哥下台好正常
理大社會政策研究中心主任鍾劍華指出，反送中運動令警隊形象空前低落，變成過街老鼠，警員及其家屬面對個人安危，自然怨氣重，「警民對立同暴力不斷提升，目的係保護林鄭同警隊管理層，就算警察埋怨示威者粗暴，佢哋都睇穿推佢哋平亂，你哋就嘆冷氣，故此佢哋極度憤怒，要林鄭同一哥下台，係好正常反應」。
鍾續指，政府挾警自重，警隊又越界，「令市民越嚟越唔尊重警方，造成惡性循環，上咗條不歸之路，你收返又驚影響警隊士氣，造成兩邊不是人」。他認為只有成立獨立調查委員會才可扭轉當前困局，「獨立調查唔係針對前線警員，唔會郁到佢哋，只係針對管理層，而且應該將焦點放喺警隊整體部署，才可緩和社會氣氛」。
有警隊高層稱，明白前線人員面對的困境，「照顧同事福利及身心健康係我哋現在嘅重點之一，會盡一切可行方法去做」，重申「警隊係大家庭，同事就係家人一樣」。