禮拜三曼聯喺澳洲踢第二場季前熱身賽，結果成功以4:0大勝英冠嘅列斯聯。其中今仗以正選出場嘅前鋒格連活特為球隊先開紀錄，打開大勝嘅序幕。賽後領隊蘇斯克查都大讚呢位年僅17歲嘅自家青訓表現出色，仲話唔排除英超揭幕戰對車路士會畀佢擔正。
禮拜三一戰，格連活特以正選右翼上陣，開波只係七分鐘佢就接應右閘雲比沙卡嘅傳中，門前射入先開紀錄嘅一球。
其實呢位17歲小將上季為曼聯U18踢U18英超，上陣30場射入31球，數據認真誇張。而喺上季曼聯超多傷兵嘅時間，佢同鍾達希同埋安祖高美斯等嘅自家青訓齊齊被提拔上一隊，歐聯對巴黎聖日耳門嘅次回合比賽仲有份喺比賽尾段上陣。另外佢今年代表英格蘭U17出戰U17歐國盃，分組賽三場比賽都有入波，絕對係矚目嘅明日之星。
隨住盧卡古大有可能轉投國際米蘭，紅魔嘅前鋒人選就剩係得返拉舒福特同埋安東尼馬迪爾，所以嚟緊一季都可以預期格連活特有唔少機會。領隊蘇斯克查都大讚呢位小將嘅演出，「佢可以入波真係好戥佢高興，呢球係佢一隊嘅第一個入波，希望可以幫佢減壓。佢嘅走位、埋門觸覺嘅敏銳同埋智慧，都證明佢係天生踢前鋒嘅人。」蘇B仲講到明，如果活特可以喺熱身賽keep住好表現，仲有機會喺新一季開鑼戰鬥車路士嘅大戰正選上陣，前途無可限量。
皇馬賣五將套現換普巴
禮拜三熱身賽有份正選上陣嘅中場保羅普巴，離隊傳聞就一直無停過。最近西班牙傳媒就報道，皇家馬德里打算送走加里夫巴利、占士洛迪古斯，以及艾斯高在內嘅五位球員。除咗瘦身之餘，亦希望套現，然後用高達兩億歐元嘅價錢簽入教練施丹嘅心頭好普巴。而普巴嘅經理人拉奧拿都放風指出，普巴家下都仲係紅魔球員，不過遲啲就唔知囉。
曼聯捧英超難過搵到外星人
新一季嘅英超仲有唔夠一個月就開波，足智彩喺周四已開出新一季英超奪標賠率，大熱門曼城賠率係1.27倍，次熱嘅利物浦就係2.75倍。紅魔鬼嘅奪冠賠率就同車路士一樣係27倍。外國有博彩公司開出搵到外星生命體嘅賭盤，今年內發現外星生物嘅賠率都竟然只係得6倍，熱過曼聯贏英超好多，唔通曼聯贏英超仲難過見到外星人？