呢排香港社會立立亂，警察濫權濫暴，市民就算反抗都會隨時被拉，好多網民話香港情況同蝙蝠俠漫畫入面嘅葛咸城冇乜分別，最好有蝙蝠俠嚟幫香港人！原來9月香港真係會出現召喚蝙蝠俠嘅蝙蝠標誌訊號燈，但蝙蝠俠呢個超級英雄係唔會出現打救香港，因為呢個只係蝙蝠俠誕生的80周年活動。
半島外牆現Bat-Signal
9月21日係蝙蝠俠誕生80周年日子，香港會有慶祝活動，當晚8點尖沙嘴海旁嘅半島酒店會亮起Bat-Signal，即係戈登探長召喚蝙蝠俠嘅訊號燈，喺酒店外牆上投影出巨型蝙蝠標誌，仿效原著即象徵召喚英雄出動；另外又會喺同日傍晚6點，係西九海濱舉辦4公里夜跑，參加者要cosplay蝙蝠俠入面嘅角色。
當然呢個活動只係一個普通文娛宣傳活動，但對好多香港人嚟講，呢個時候講蝙蝠俠、葛咸城真係好應景，因為香港已變到同漫畫入面葛咸城一樣，市民唔再信警察，正直警察如戈登探長要靠召喚蝙蝠俠去對付罪犯同黑警，不過蝙蝠俠只係漫畫角色，而且港共比漫畫入面奸角小丑、企鵝、雙面人惡毒得多，香港人最後都要靠自己捍衞香港。
李八方