這樣的時勢讀到這樣的新聞，真可謂苦中作樂，雖然屎尿屁題材向來被視為低級趣味，笑咗先至算倒不是壞事：有個移民加拿大的劉姓內地青年，趁回鄉探親之便暢遊香港，寶貴的觀光時間不花在廣東道濕平或二樓書店搵禁書，也不去海洋公園迪士尼樂園打卡，偏偏選擇在尖沙咀某商場公廁偷影鄰格男子大解，受害人辦事時驚見頭殼頂出現揸機怪手，氣沖沖過隔籬理論，小劉如林鄭和盧偉聰一般龜縮反鎖在內，報警後當場捕獲，被控於公眾地方擾亂秩序。日前開庭，結果罰款四千，兼遭吳姓女裁判官痛斥：「你真係有問題，如果精神冇，心理都會有。人哋屙屎屙尿有乜嘢咁好睇？仲要係男人，未見過呀？擒咁高，裝人私人嘢。」
吳判官素有金句王美譽，心直口快言之成理，我當然不敢駁嘴駁舌，但由於代入感天生特別發達（所以冇發達），情不自禁思索那兩大問題的具體答案。首先，鹹濕基站在公廁尿兜眼尾掃瞄左右，男人各種排尿狀況略有所睹是不爭事實，而且恐怕比一而再興高采烈描述「射過界」和「滴濕鞋」的李碧華女士還要見多識廣哩，然而缺乏照顧BB和失禁老人經驗的關係，屙屎的確未見過──也不想見──小劉的越格行為其心可誅，卻似乎徒勞無功，鏡頭凌空而下無論如何拍不到解放實況，係我就會鬧佢死蠢。至於屙屎有乜咁好睇，對不起，只能交白卷，不過開講都話人各有志，未經許可侵佔陌生人私隱千錯萬錯，心癮（或曰心魔）本身倒不一定是錯，我反而覺得「仲要係男人」可圈可點，換咗偷拍女人大便，難道罪孽較輕？