甄志強去年製作了音樂劇《難兄難弟》，反應熱烈兼有口碑，後日在屯門大會堂重演一場，小強再邀得區靄玲和麥翠嫺及約200名小朋友一齊演出。區靄玲和麥翠嫺日前在圓方接受《蘋果》專訪，中女對對碰，區靄玲說：「我哋好細個，十幾歲就識，私下好friend，會一齊約食飯，我哋打扮又好似。」麥翠嫺也說：「十次有八次都撞衫、撞飾物，冇夾過，大家自然都買埋同款嘅嘢，有時出嚟又着埋一樣。」
麥翠嫺在音樂劇中扮一名孤寒的快餐店老闆娘，她說：「我係演尖酸刻薄嘅老闆娘，角色同真人唔同，我上台就上身。」區靄玲演訓導主任：「好開心同200個小朋友合作，佢哋由3歲到15歲，大中細碼乜都齊，今次演出好多小朋友同上次唔同，舞步又重新編過，好有新鮮感，我都要跳番幾步。」二人綵排可有拗撬？麥翠嫺說：「我對事唔對人，聽咗意見先。」區靄玲則說：「正常佢（麥翠嫺）意見多啲，大多數我buy佢。」