「反送中」運動事發至今，冇問責官員下台、唔回應民間五大訴求嘅林鄭班子明顯想再起步，調整應對策略搶攻輿論。
指特首言論不影響律政司
好似星期日沙田反送中遊行結束後，因警察突然衝入新城市廣場鎮壓示威者，引發流血衝突，特首林鄭月娥翌日探望受傷警員，形容示威者係「暴徒」，《金融時報》日前一篇報道就話林鄭將示威者定性為「暴徒（rioters）」非常標誌性，可以畀警方用更嚴重嘅罪名檢控示威者，結果特首辦助理處長都要打真軍，親自投稿「闢謠」。
呢篇報道似乎觸動咗特首辦嘅神經；特首辦助理處長（傳媒）姚繼卓（圖）周二（16日）以真身投稿《金融時報》，以〈香港司法機構會公正地履行職責〉（Hong Kong's justice department will discharge its duties impartially）為題，反駁《金融時報》報道唔正確，話特首同律政司過往已多次表明，執法機關調查違法行為後，由律政司獨立決定起訴與否，特首或任何人嘅任何描述或定性（characterisation）都唔會影響律政司根據《基本法》公正履行其起訴職責。
講真吖，上述論點都係無限loop，但八方相信政府自己都深知肚明，鄭若驊民望已跌至歷任官員新低，冇晒認受性，點會能夠令公眾相信，佢會作出公正決定？又咁講，助理處長撰文投稿都唔係首次，不過適逢此際，相信唔少人都會對內文更着意。