台灣歌手蕭亞軒前年開始暫停工作，噚日清晨佢突然喺Ig公開咗一段片，片中嘅佢精神恍惚，以十分低沉嘅聲音話：「Good morning guys，我現在在北京！」突然佢靜默咗數秒，然後話：「我剛才睡着了？我想我的小孩，我不知道要講甚麼，我會讓我自己慢慢的看到開心的自己跟你們想要看到我，和我想看到的自己，OK，miss u guys ，我想睡覺了。」講完佢又再靜默咗數秒，再驚醒地話：「嗯？我要睡覺嗎？」影片隨即中斷。
懷疑飲醉酒
蕭亞軒喺短片旁邊留言：「只是我的生日過程，沒有小孩，可是我肚子餓了，吃完我就會睡了。」唔少網民擔心佢嘅精神狀況，有人猜測佢係咪飲醉酒，直至朝早，佢回覆台灣蘋果新聞網：「我想念我的小孩是指想念我的狗狗，我的貓。」經理人公司亦喺微博留言：「最近在北京處理工作事宜，得知她的狗狗（毛小孩）生病，很着急也很擔心，半夢半醒狀態，抱歉讓大家擔心了。」
蕭亞軒舊年3月因為籌備新專輯壓力過大，導致身體狀況出現問題，其後有傳佢患上愛滋病，不過經理人否認，澄清佢只係患上較嚴重嘅支氣管炎。
撰文：馮仁昭