7.14沙田新城市廣場爆發流血衝突，市民對新城市廣場「引警察入關」嘅做法非常不滿，民主黨立法會林卓廷前晚有到場聲援，但因為指有青年「帶一大袋鐵通」入商場，被示威者質疑「篤灰」，之後仲有人網上造謠老屈佢去報警，而阿廷噚日喺fb話，已經刪走疑似青年嘅相，強調只係希望大家平安。
聲稱繼續追究新地
林卓廷話有助理影到有人「帶一大袋鐵通」入商場，呼籲在場市民冷靜同唔好將行動升級，但有關言論隨即惹起在場人士不滿，鬧佢影抗爭者相同埋篤灰，阿廷之後喺fb解釋，話已刪走相片同絕不會外傳，強調自己係「不願再看到示威者被打、被捕、嚴重受傷、甚至犧牲」，先作緊急呼籲，重申一切唔係割席，只希望持鐵通嘅人「停一停，諗一諗」，避免流血，佢仲話網上不斷有人抹黑佢，話佢去警署報警交出義士嘅相，佢強調絕無其事，係有人惡意中傷，又重申會向新地繼續追究事件。