【香港書展2019】香港書展昨日於灣仔會展開鑼，今年的風頭躉不只性感寫真𡃁模，還有一直堅持為港發聲的何韻詩。阿詩在書展設攤位，並推出新書《當你仍在這裡》，她在新書中鼓勵抗爭人士要保養身體，令自己內在更加強壯作長期抗爭。昨日阿詩現身書展宣傳新書時，除了有不少年輕人支持，更有長者fans排隊影合照。
何韻詩自上月逆權運動開始，一直站在前線抗爭，不過今年書展她也如常擺攤，除了發售演唱會限量CD加DVD、T恤等，還推出新書《當你仍在這裡》。昨午約黃昏5時半，阿詩現身自己的攤位為新書造勢，除了吸引不少年輕人排隊買書，當中更有長者fans排隊拍合照。
阿詩受訪時表示︰「本來呢本書大概5、6月寫，但當時市面咁嘅狀況，我一度諗住出唔到，但最後我都決定寫埋佢，呢本書係講人生遇到咁大嘅困難、咁大嘅抗爭，呢個時候我哋要好好照料自己，點樣保持心境平和，好好保養身體繼續抗爭。係個人呢5年來嘅體會同埋現實，點樣令自己內在強壯啲，而我哋大家必須去做。其實係好basic，要好強健嘅內在，可能我都要去學boxing，先可以面對咁黐線嘅世界。」
談到周日在沙田新城巿爆發的警民衝突，當晚置身現場的阿詩表示︰「我唔明政府究竟係採取個乜嘢方法處理，佢哋似乎想製造好多人反抗嘅畫面，唔明點解要逼啲想走嘅示威者去商場，要走又走唔到，仲加埋啲路人、市民，示威者唔會真係個個舉高雙手畀你打㗎！反抗係自然反應。」
戒嚴宵禁太荒謬
阿詩坦言越來越擔心：「年輕人好難好冷靜面對呢件事，作為紀律部隊要好好控制自己嘅情緒，有壓力都唔可以亂打人。」談到在遊行現場被罵，阿詩則說︰「我畀人鬧一、兩句好閒，但警方有槍、有武器，可以殺人、致命。」對於有傳政府建議分區戒嚴及宵禁，阿詩怒斥︰「如果傳聞係真就太荒謬！林鄭冇盡責任，點解佢唔好好回應大家訴求？呢個係政府問題。」
至於未來各區都有遊行，阿詩覺得是正確方法：「我哋唔可以控制輿論、傳媒，各區遊行可以畀啲平時只睇無綫嘅叔叔、嬸嬸睇到，遊行係和平同克制，只要冇警察，其實一啲暴力都冇發生。」網上有人提議在書展圍堵中資出版社，阿詩認為：「用和平方式表達，每個人都有權咁做。」
陶傑：抗爭留場外
另外，陶傑到書展為好友劉天賜（賜官）的講座擔任嘉賓，對於有網民發起圍書展，特別是中資出版社，陶傑表示如果要抗爭，社會的抗爭應留在場外：「書展呢個場合都係一啲書迷嚟睇書，如果要走嚟圍書展我覺得唔係咁好，始終中資出版社都對文化都好有貢獻。」問到賜官有否留意反紅媒運動？他即迴避說：「我啱啱喺多倫返港，唔清楚。」
採訪：曹家誠
攝影：沈健程、林賓尼