早前立法會仲喺復修階段時，經民聯嘅梁美芬要喺立法會外「扑咪」，其間被民陣副召集人陳皓桓同大叔上前狙擊，嚇到落荒而逃更被的士拒載，最終搞到要匿入立會大樓避，噚日朝早網名叫「羅莽360」嘅連登仔，就喺旺角一間酒樓撞到曾被網友形容外貌同羅莽有幾分似嘅「鼠王芬」梁美芬！羅莽360話，鼠王芬當時喺佢前面張枱背住佢坐，其間「好激動」咁同人傾偈，仲問一眾連登網友點做好？連登仔就提出唔少搞笑建議，包括叫羅莽360離開酒樓時大叫一聲，問間酒樓「點解畀咁大隻老鼠入嚟？」、有網友就話要「報食環」，更有網友叫佢不如仿效日前經民聯大狀丁煌落區時兇女途人嘅做法，叫羅莽360走埋鼠王芬度大嗌：「太古西不要連儂牆！」計我話不如叫早前於立法會嚇到佢走夾唔唞嘅大叔，再出招一次！
梁：啲人纏擾我
鼠王芬噚日喺立法會出席記招後，回應連登仔將佢飲茶相放上網一事時就話：「啲人係咪想纏擾呢？我唔知道」。記招上講過自己曾成功令連登移除不實消息嘅佢又話，「連登啲人鬧嘅嘢，我都唔睇嘅！我冇嘢，我只係話畀朋友聽，我哋今日去飲茶，人哋影咗」，強調「我冇驚呀！我點解要驚呢？」問到同朋友傾偈時係咪一度「好激動」？佢就話不便透露任何會面詳情。
李人方