熱刺領隊普捷天奴一向都鍾意提拔年輕球員，目前一隊嘅哈利卡尼同獲加彼德斯等等都係青年軍出身，而普帥年僅18歲嘅大仔梅里斯奧周一都同熱刺續約四年，普捷天奴亦擺出同新兵簽約或者續約球員時合照嘅招牌甫士，不過由眼神睇得出佢相當自豪。梅里斯奧已經效力熱刺青年軍四年，呢位司職翼鋒嘅小將續約後會升上U23梯隊。梅里斯奧據報係喺熱刺U18青年軍表現出色，可以續約係靠真材實料而唔係裙帶關係。梅里斯奧四年前跟爸爸喺修咸頓青年軍效力，之後轉投熱刺，上季喺U18聯賽上陣過21次。睇嚟普捷天奴都好滿意囝囝表現，合照嗰陣擺晒單手攬住對方肩膀嘅甫士，笑容亦相當燦爛。