車路士新兵基斯甸普列錫踢完金盃冇耐，周二就提早去到日本同車仔大軍報到，仲即刻開始操練，希望可以喺新帥林柏特心中留番個好印象，尤其喺王牌夏薩特離隊之後，位置相同嘅普列錫更加要努力希望可以填補空缺。普列錫雖然兩個禮拜前先為美國踢完美洲金盃，不過佢就放棄假期提早報到，仲獲得主帥林柏特盛讚：「佢周二就同我哋一齊，因為佢想快啲融入球隊。呢個態度好值得欣賞，以前我都試過縮短假期盡快歸隊。普列錫今次轉會係佢職業生涯嘅一大進步，目前球隊好需要佢，我未曾親自見過佢，只係傾過電話，但我對佢嘅印象已經好好。」受轉會禁令困擾嘅車仔，今夏只可以收番普列錫同買斷借將高華錫，好大機會再冇新兵。