香港足球代表隊喺世界盃外圍賽嘅分組抽籤結果已經塵埃落定，但港隊嘅前任主帥加利韋特又有新聞，呢位出晒名好鍾意食拉麵嘅英籍教練早前去埋日本執教日乙球隊東京綠茵，但球會就喺禮拜三宣佈，因為成績麻麻嘅關係，所以決定炒咗即將45歲嘅韋特。
香港球迷對加利韋特當然唔陌生，而且又愛又恨。事關上年九月佢正式上任港隊主教練，結束咗港隊成九個月無教練嘅黑暗時期。之後喺11月嘅東亞盃外圍賽，呢位神奇教練帶領球隊成功力克老對手北韓，拎到今年嘅東亞盃決賽周參賽資格。
韋特教港隊三個月請辭
正當香港球迷希望呢位主帥能夠領導港隊創一番事業之時，上任僅僅三個月嘅韋特忽然辭職，事件震驚成個香港球圈。
更令香港球迷覺得震驚嘅係，僅僅喺佢離任一日之後，就即刻傳出佢上任日乙球隊東京綠茵主帥一職，實在傷咗唔少球迷嘅心。韋特喺上任嗰陣就誓言要帶領球隊重返日職。不過，日乙球季過咗一半，東京綠茵喺22輪入面只係得7勝8和7負，家陣憑29分排第13位，而且球隊今季防守認真一般，日乙嘅前15位球隊當中，就只有綠茵一隊失波仲多過入波。雖然冇咩降班危機，但亦同衝上日職嘅目標相距甚遠，同可以出戰附加賽、第6位嘅甲府風林都差成7分咁多。以綠茵上季可以打到去升班附加賽最後階段，只係輸畀日職嘅磐田山葉嚟計，今季戰績實在唔能夠接受。
輸畀業餘隊成導火線
更加令管理層憤怒嘅，應該數上禮拜三天皇盃第二圈賽事綠茵鬥業餘球隊法政大學嗰場波。對手已經有主力前鋒上田綺世去咗踢世大運缺陣，不過綠茵照樣輸兩蛋，提早出局。唔少日本傳媒都認為呢場天皇盃係導火線，加上禮拜日對金澤薩維根最終都只能打和，所以禮拜三就決定怒炒韋特。
炒咗加利韋特之後，球隊已經決定請曾經踢綠茵前身川崎讀賣嘅名宿永井秀樹接任主帥，希望呢位48歲嘅青年軍教頭，可以帶球隊重上正軌。至於曾經執教過英屬處女群島、關島同埋中華台北嘅加利韋特，暫時就未知佢嘅新去向係去邊，不過有網友就表示，與其留喺日本食拉麵教球會，不如都係做番老本行去教國家隊好似啱韋特風格多啲。