【本報訊】老友記，一樣有火，包括兩位一向敢言的牧師。佔中三子之一的朱耀明（圖）發言時炮轟林鄭沒保護年輕人，不配做母親；袁天佑更直指政權是連串警民衝突的暴力源頭。
朱牧指近期有很多年輕人無法入睡，因害怕參與示威而被捕，「林鄭，你會唔會同情佢哋呀？你根本不配做母親，母親係會愛惜兒女，但你讓警察今日去搜捕年輕人。你管治呢個地方，你唔係要保護人民生命財產嘅安全咩？點解要製造呢啲恐懼？」
林鄭是天主教徒，朱牧引述《聖經》向她告誡：「你要行善呀，唔好行惡，否則你一定會滅亡。你唔需要逐個逐個去見嘅，你只要答應五個訴求，社會就會和諧。林鄭，你聽住，只有公義先能夠締造一個和平社會。你今日搞對抗、搞分化，令香港更加亂。我哋呼籲林鄭月娥你要悔改認罪呀！」
袁天佑：這個政權是暴力源頭
袁天佑牧師發言時引述警務處長盧偉聰周一的說話，表示「有啲人已經好似失去咗常性咁，將人踢倒之後，仲要繼續打」。他意有所指說：「我希望一哥好認真追究，警察嘅工作係保護人身安全，但係禮拜日晚走入廣場當中，有理冇理咁廝殺，唔單止傷害示威人士，嚇到好多老老幼幼嘅人，心裏面好驚恐，你覺得呢啲係保護人身咩？」
輿論近期多次批評林鄭在處理反送中上屢誤戎機，袁牧昨亦批評，如果6月9日就撤回修例，就不會出現6.12、7.1及之後連串警民衝突，「所以今日暴力源頭唔係警察，又唔係市民，係呢個政權」。他呼籲政府回應人民訴求，徹底調查事件、落實真普選。
■記者何家朗