老友L有大陸朋友訪港，設接風宴於某會所，八、九位其他朋友出席，港人齊集之後，老友K特別用廣東話講一次：「今晚不要講政治，以免大陸朋友聽到不自在及大家發生爭執。」眾人稱善，於是盡講風花雪月，佳餚美酒入晒肚之後，進入茗茶甜品階段，誰知一位港人還是忍耐不住，問大陸來客：「C先生，你咁有歷練，點樣評價我哋特首林鄭呢？」大煲，C先生望老友L一眼，只係講咗一句：「好像還沒能看清楚局勢？」該位港人當然追問，C先生不再答，其他港人有藍絲黃絲，而以前者較多（老一輩成功商人及專業人士嘛），七嘴八舌，卒之甜品未食完，已經面紅耳熱，令老友L及C先生十分尷尬。
戒講政治，如何避免得了。肥仔K去睇醫生，醫生自細睇到佢大，一面寫藥，一面望住CCTVB，低哼一句：「淨係見到示威者圍攻警察畫面。」肥仔K不禁失笑。佢一位朋友嘅朋友幾年前大學畢業，來自知識家庭，父母讀大學時已拍拖，同是共產主義信徒，畢業後加入左派陣營搵食，受到栽培，三十年來生活無憂，可說深受「皇恩」，故此佢哋位寶貝仔自幼耳濡目染，被認為係建制派新一代。發夢都估唔到，兒子自新城市廣場戲院睇戲回來，滿頭大汗，一入門就聽到父母睇TVB新聞，齊聲大罵「暴徒襲警」，兒子大叫一聲：「shut up！」，衝入睡房大力閂門。父母為之一驚，走去拍門，兒子不應，兩老驚兒子有事，高叫阿仔開門，如是擾攘一輪，兒子突然開門大吼：「我哋唔係暴徒」。父母向後退一步，兒子跟住又閂門。父母於是成晚瞓唔着。唔怪得港大有調查話香港有9.1%市民精神有事，《送中條例》幾個月來為香港製造政治緊張、家庭反目、朋友斷交、警民仇恨、警媒不和、社會不安，實不知如何收科。金融時報報道林鄭數度請辭，中央不准，要佢留低搞番掂一團糟局面，因無其他人願意接任也。消息一出，特首辦立即否認，跟住話係fake news，金融時報指有兩位知情人士係消息來源，以西方一級大報標準，極少傳播空穴來風謠言嘅，必有所本。即如大公報在6月15日社論明言林鄭當日會「撤回」條例，據左報人士講係有可靠消息來源㗎，點知會有人臨時改劇本嘅啫。林鄭既然搞出個大頭佛，為香港添煩添亂，有無辦法收拾殘局呢？政治問題要政治解決，佢一味靠警力鎮壓，遲早為香港帶來橫禍。