前香港足球代表隊隊長陳偉豪於6月16日與太太參加200萬+1人大遊行，數日後有市民轉貼他參與遊行，高舉寫上撤回惡法、釋放學生及傷者及林鄭下台的紙牌到社交平台，市民大讚他好波，是真正的香港隊長。這位向來喜歡表達意見的守衞坦言，真正好波是勇於站出來抗爭的年輕人，「冇呢班勇敢嘅人，好多嘢已經過咗，全靠佢哋暫時守住，佢哋先係出色守衞。」陳偉豪如是說。
記者：曾雁平
攝影：李家皓、夏家朗
雨傘運動後對年輕人改觀
在這個世代，不是很多公眾人物敢於向政府說不，尤其在左傾的體育界，運動員敢於站出來的更少，陳偉豪是少數。五年前的「雨傘運動」，他親身到金鐘、銅鑼灣及旺角了解年輕人在現場做些甚麼，今年初夏的《逃犯條例》修訂觸起民憤，令他繼2014年後再走上街頭，向政府表達訴求，不同的是，今次上街多了太太在旁。
37歲的偉豪坦言自小愛表達自己看法，或與性格有有關，他說：「由細到大基本上係乜都講，當然要睇場合，好怕屈埋自己，鍾意講嘢去表達自己，可能得罪人都唔知，但唔會將啲嘢收埋，屈埋屈埋會屈到病，講咗舒服啲，大前提係唔傷害人就可以講。近年少咗，盡量唔公開表達諗法，但有傳媒約訪問會盡量配合，做訪問係想知事實同我嘅諗法，家陣做訪問會再講深入少少，可能同年紀大咗有關。」
「雨傘運動」期間，偉豪與友人到場原意是了解實況，因不想單靠上網或看新聞，他說：「雨傘運動前，對政治冇乜立場，唔知咩係民主派同建制派，雨傘運動開始後唔想只睇傳媒嘅報道，所以親身到場，現場接觸到呢班人，感覺完全唔同。當時好多人話90後係廢青，但親身接觸過後對後生仔完全改觀，同我接觸嘅90後球員完全唔同，佢哋好有秩序，有禮貌，三唔識七，走嚟派飯派水畀我，唔亂拋垃圾，唔惹事生非，如果由佢哋決定香港未來應該靠得住，年輕一代有希望，同只接觸足球世界嘅球員有啲唔同。之後幾支持佢哋，佢哋有一種信念，唔講係咪犯法，有人做合法嘅事，但內裏都可以係十惡不赦。」
新一代想法堅定自感羞愧
對比「雨傘運動」，偉豪指今次更大件事，因向來不看新聞，不理政治的太太也主動要求上街表達不滿政府的訴求，可看到事件有多嚴重，因為影響不止這代，還有下一代。「出嚟行只係出一點綿力，行5、6個鐘，真真正正靠一班比較勇敢嘅人，如果唔係佢哋，好多嘢已經過咗，全靠佢哋暫時守住，佢哋係出色守衞，我唔係。太太從來唔提政治，太太叫出去行，當然好，非常好，呢啲情況要出嚟，7.1好少行，呢次關乎下一代嘅事，要盡啲綿力。」
不怕運動員身份而懼怕表態嗎？偉豪強調，因為以一般市民身份參與反修例遊行，如連遊行也懼怕，那就真的沒希望，並指自己只是低調遊行：「唔通下次要戴埋飛虎隊頭套遊行？我覺得唔使，如果咁樣都算有問題，咁就係佢哋嘅問題，所以冇得驚。自己亦從來唔會主動叫人遊行，每個人立場唔同，出嚟行已預咗俾市民認到，見到好多人，有打招呼，我都係香港人箒，正常遊行，唔使戴口罩，唔怕俾人認到，怕咩？又唔係壞事，以遊行表達訴求，香港仲有自由，可表達訴求，影響唔止下一代，成件事對香港冇着數，有人拎公義出嚟講，唔好玩啦，攞啲口術去製造啲藉口推一啲嘢，呢啲係個人利益。」
事件上，像他這樣的中年人，除感無助，還要靠能力其實有限的年輕人「衝」，偉豪自感羞愧。「因為有家人，好多嘢要諗清楚，可做嘅有限。當年讀書留班唔覺得醜，仲同阿媽講又留班，家陣坐喺屋企睇新聞，幫唔到年輕人，有少少無助，亦自責好冇用。網民話我係香港隊長，其實只係前香港隊長。」
年輕球員低調上街支持
偉豪透露以他所知，有不少球員有參與6月9日及16日的2次百萬人大遊行，當中更以年輕一輩為主：「大部份後生嗰班，其實係有出嚟遊行。以市民身份遊行唔係想代表咩界別，但喺體育界畀人感覺唔係太好，而足球涉及唔止球員，仲有商業同贊助，所以球員相對比較低調，就算有去，都唔會喺社交平台貼相貼文打卡。」
有不願透露姓名的港超聯年輕球員承認，曾參與兩次百萬人遊行，但只是以市民身份與朋友參與，以示反對惡法，並指兩次參與遊行的人數之多及場面非常震撼。偉豪表示：「可能有啲人對件事冇立場，但可能見到好多藝人一啲睇法而影響到佢哋嘅想法，自己未有咁大影響力，只係做番普通市民要做嘅事。」從今次事件所見，他覺得這代年輕人的想法更堅定，勇於表達訴求。
社會撕裂政府責無旁貸
雖說體育不應牽涉政治，但實際上並不可能，像香港各大小體育總會隸屬港協暨奧委會管轄，又靠政府資助營運及推動，故香港體壇明顯親建制派，不過，今次反送中的逆權運動中，部份本地體育名將如李慧詩、陳婉婷等也先後在社交平台撰文撐港人。
對於年輕一代不惜賠上前途也要抗惡法，偉豪的論點是年輕一代不希望香港再變，上一代卻反斥這代「搞搞震」：「明唔明班後生仔幫緊你哋，家陣係邊個加緊啲嘢，改呢啲，又改嗰啲，大家諗吓以前嘅和諧，家陣邊個變緊呀？係個政府變嘛，上一代話唔想變，家陣話班後生仔出嚟反抗係錯。」社會出現嚴重分歧，年輕義工於各區守護遍地開花的連儂牆也遭反對者襲擊，可想像社會對立有多嚴重。
偉豪坦言家人反對上街，已到沒有甚麼討論空間的階段，彼此成長年代不同難免有代溝，但已到沒有討論空間則始料不及：「我哋呢代唔同，有小朋友要供書教學，生活好艱難，社會分裂係邊個搞到咁？係政府。兩代人有代溝，惟有避免講呢啲事，踢波同湊孫，諗法唔同就唔傾呢個問題，以前香港好，在於有自由，家陣係嚟鬧你，冇晒和諧。」他指其實大家沒有仇恨，意見可以不同，應可找到包容點。
對香港人來說，這段時間確實很困擾，偉豪建議大家不開心時應減少上網，希望令情緒冷靜些，自己暫時不看電視，讓給兩個兒子看，如看便看幾個平台的報道，只看某一個電視台容易「領嘢」。
