午飯期間，一位老友過枱走來呻苦，話佢集團旗下酒店之六月入住率下跌，到咗七月仲弊，內地團退房電郵日日收到，大老細追問點解，於是佢又趁午飯之便，問左丁山有乜意見。
這可能是呢位老友C嘅個別情況，亦可能係整個行業共同面對之境況，內地團素來不是百分百人民自主的，例如杯葛韓國時，內地人就少去南韓；蔡英文上台，台灣迎接陸團就冇晒影，反映出北京不時利用人民旅行權利作為政治籌碼，用行政手段禁止旅行團到「敵對」地方。
如果老友C所言屬實，解釋只有兩個，就係（一）內地人驚怕殃及池魚，畀示威嚇親，視香港為危險地方，（二）內地政府暗中表態，要懲罰香港唔聽話，不鼓勵旅行團來港，兩個理由邊個大啲？飯後問一位酒店界資深人士，佢話六月入住率平均約下跌2%，房價下跌5%，七月份估計入住率下滑6%，房租下滑8%至10%，過往暑假亦比較淡靜，通常入住率與房租均會下跌。
又有一位老友M係張華峰行家，佢話唔怪得張華峰緊跟中聯辦指示呀，因為大部份行家都知道，今天香港人炒黃金股票外滙，均大大聲小小注，每日頂多幫襯十萬八萬，而內地客戶落注炒甚麼都好，一出手就三幾十萬，過百萬以至一千萬，所以現在收益來自本港客戶，不及一成，九成靠大陸客，米飯班主也，邊敢得罪，想唔做藍絲都唔得。
左丁山立即問：「內地客如何找數結算？」老友M顧左右而言他；飲啖茶，話有事要返公司，下次再傾。走得咁匆忙，唔肯講，左丁山明白嘅。內地之資金管制日趨嚴格，特別係中美貿易戰之後，中央為防走資，睇得非常緊，滙錢落香港，冇咁容易咯。
餐飲M朋友多，有一位係找換店小股東K。餐飲M為上述問題請教股東K，K先生話：「而家好難有大筆人民幣滙過來，三年前還可一筆過收到內地錢莊滙一千萬元，而家呢，滙一百萬都要分兩筆，五十萬一次，工夫多咗，銀碼細咗，即係我地賺少好多，一啲金股滙交易，生意額亦因此下跌，不是冇生意，而係結算好慢，逼住本地經紀行唔敢大做！」左丁山出身銀行界，當然知道大筆交易亦有外國勢力干預，令香港之AML（反洗黑錢法）極度嚴苛，銀行為之怕怕，對大筆滙款入戶口，一定問三問四，問到你煩，詹培忠以前成日講，水清則無魚，就是如此。或曰，人地新加坡又點？騎騎，香港唔明白啫，新加坡政府好識得Be water之真義，佢地嘅人均GDP逐步拋離香港，有道理㗎！