盧凱彤（Ellen）去年8月5日喺跑馬地寓所墮樓身亡，下月就係Ellen逝世一周年。噚日Ellen嘅facebook專頁公佈咗紀念活動詳情，而佢嘅生前好友林二汶、黃耀明同岑寧兒（YoYo）等，噚日都喺網上轉發活動嘅詳情。
其中，《盧凱彤 Come What May 紀念音樂會》將於下月29日至9月1日，喺灣仔藝術中心嘅壽臣劇院舉行，最後一日仲會加開日場，總共五場，門票今日喺城市售票網公開發售，嘉賓方面只係公佈有「The Ripples Band and friends」。不過，據知演唱會每晚演出歌手有黃耀明、林二汶、岑寧兒同樂隊雞蛋蒸肉餅外，仲可能有唔同嘉賓出現，而何韻詩都會係演出嘉賓之一，但就唔會每晚都現身。
下月有展覽
除咗音樂會外，同時會舉行《盧凱彤 Come What May 紀念展覽》，到時會喺香港藝術中心4樓包氏畫廊舉行，時間係下月26日至9月1日，門票到時將會喺現場發售。其實喺今年3月27日Ellen嘅生忌，遺孀余靜萍喺台北舉行咗《你的左手我的右手》展覽以作紀念，同時亦推出Ellen生前未曝光嘅一首歌曲《光》。有唔少網民知道呢個消息後，大家都話好掛住佢，仲話8月5日係一個令人痛心嘅日子。
撰文：馮仁昭