連儂牆喺全港各區遍地開花，不知言論自由為何物嘅保皇黨一味話要拆，好似經民聯大律師丁煌就飛咗去太古城搞簽名運動，要求民主黨太古城西區議員趙家賢拆咗佢幅連儂牆。有女途人睇唔過眼同煌理論，點知煌舉起雙手湊近女途人，狀甚恐怖！
趙家賢早前就將自己區內嘅橫額位置化身連儂牆，畀居民寫心聲。點知疑似會參與區選嘅煌，噚日喺區內擺街站搞簽名運動，要求趙家賢拆咗幅牆，有位小姐見狀，上前問煌個街站有冇申請時，煌一聽到就發難，走近該名小姐不斷高聲大嗌：「太古西不要連儂牆！」嗰位小姐當然被嚇一嚇，點知煌繼續逼近，嗰位小姐大為不滿，批評：「你（丁煌）答唔到我嘅問題，然後你兇我？」
與此同時，一位路過嘅女士亦對煌呢啲行徑大感不滿，叫煌行開啲。被煌逼近嘅小姐亦質問煌係咪想上前非禮，煌一聽騎呢地轉台講英文：「Tell me your quality」。跟住有太古城男居民見到煌咁樣兇女途人就立即喝斥煌：「收皮啦你！你喺度阻住我哋太古城居民呀！」煌聽到後，又再九唔搭八用英文話：「Where is your mask？」男居民答佢：「我住喺太古城㗎！居民表達有乜問題啊？要唔要連（儂）牆唔係你話嘅！」其他途人不滿，紛紛叫被煌威嚇嘅小姐報警，搞到咁煌先至肯離開。八方打過畀丁煌查詢，至今未獲回覆。