陳偉豪早前接受本報專訪時，毫不客氣指目前效力港超聯球會的職業球員，估計有三分一未達職業水平。這位前港隊隊長指出，本地球員能力不足已是公開的事實，只是沒有人願意說出來，並指如早十年前說這番話，可能有較多人注意，情況可能好一點。
有港超聯球會教練及球員私下更指出，實際可能達一半球員水平不足，青黃不接問題嚴峻，因夢想FC自降甲組而暫為自由身的偉豪說：「港隊連台灣都輸埋，如你要我講香港足球進步好多係荒謬，你可以話香港足球係有進步，但明顯地，其他國家進步快你好多，呢啲要正視，冇得逃避，𠵱家水準唔夠，要有人出聲，我唔想球員喺溫室長大，踢到職業，代表香港對外隊先知道能力未達到水準，只停留喺學界同玩青年軍水平。」
本地缺球員接班，好些年輕球員未經過太高強度訓練便加盟全職球隊，等於踢職業才學怎當職業足球員，偉豪直指這是太遲。「港隊上場友賽，新教練選咗唔少年輕球員入隊，但佢唔知道香港足球情況，用咗好多新人。外國22、3歲球員其實已經開始成熟，因為佢哋已用十幾年時間建立基本嘢，係冇比賽經驗；香港年輕球員調轉，踢到職業先開始日操1、2課，水準確實好參差，所以要出聲。香港唔係冇具質素球員，好似陳俊樂、梁諾恆，只係比例少，其他年輕球員唔好覺得自己踢職業就ok，要不停令自己進步。」
青訓問題要重視
港隊新教練麥柏倫領軍首仗，以入籍兵及老將上陣不敵中華台北，偉豪指港隊入籍兵仍是他當年那一批，沒有當打球員，明顯斷層，亦明顯不是金錢可解決到的問題：「由鳳凰計劃到五年策略計劃，睇唔到有明顯幫助；理論上，呢10年青訓有比較多資源，錢使咗但唔覺特別好，證明唔係錢就可解決到問題，唔係叫立法會每年撥10億、20億就解決到。無論職業層面或業餘使用者，都面對訓練場地不足問題，坊間好多足球學校冇場安排訓練，青訓唔係足總組織U10、U12、U14代表隊，搵20個喺嗰個年齡層比較好嘅球員訓練就係青訓，青訓係整個社區，足總應協助搞青訓嘅足球學校解決場地問題，搞青訓冇場，要搞就要幫襯炒場，令想學踢波嘅成本提高。」他補充指足總獲政府撥款，將青訓重責攬上身未必是好事，並進言青訓可由學校開始，先培養小朋友興趣，從而增加參與足球人口。
文：曾雁平