曼聯高層今夏最關注嘅未必係買到咩球員，而係點樣保住陣中兩大主力保羅普巴同迪基亞；周二就有好消息傳出，話迪基亞終於同曼聯傾掂數，同意簽署周薪高達37.5萬鎊（約370萬港元）嘅5年長約，等成個遠東之旅完晒就會落實。假如消息係真，呢位家陣已經有傳係全世界最高薪嘅門將，就會刷新自己嘅紀錄，而且會拉開同其他世界級門將嘅薪金差距。
多第二Kepa唔止一倍
迪基亞年年都傳話會走，而啱啱呢季適逢佢只係剩番一年約，更加大條道理跳草裙舞，原因可能係覺得自己應該要同全隊最高薪球星阿歷斯山齊士睇齊，話晒後者坐多過踢都有成50萬鎊周薪，而自己幫紅魔救咁多靚波，竟然都只得嗰20萬鎊。講堅，迪基亞要走嘅可能性其實唔高，皆因好多大球會今個夏天都唔使買門將，好似四年前同佢曾經無限接近嘅皇家馬德里，上年夏天簽咗泰拔高圖爾斯後，都冇咩大意欲要執門將呢個位，所以只要紅魔滿足到人工要求，基本上一定可以留到呢位西班牙門將。
外界傳出迪基亞簽完新約後嘅周薪會係37.5萬鎊，雖然都係過唔到山神，但都足以放甩其他「同行」門將。呢位西班牙國腳之前袋緊20萬鎊周薪，已經係門將入面最高人工嗰個，但如果今次升到37.5萬鎊，其他門將真係冇得同佢比，事關排第2、效力車路士嘅阿列沙巴拿加（Kepa）都只係得15萬鎊，而紐亞、保方甚至高圖爾斯，更加唔夠佢玩。
曼聯領隊蘇斯克查周二喺澳洲出席季前熱身賽記招，亦被問到迪基亞傾掂數等續約件事，佢幾樂觀咁講：「希望我哋可以同大衛（迪基亞）簽到新約，但呢啲事都係等球會同大衛自己公佈好啲。」
英超引入對賽定排名
另外，英超官方周一宣佈新季改制，會引入對賽戰績嚟定奪球隊最終排名，但條件都係兩隊同分下會先計得失球差，如果兩隊球差連埋總入球都一樣，先會計對賽成績。英超以前係唔會考慮對賽，如果同分嘅兩隊無論得失球差同入波數字都一樣，定唔到排名，但呢個排名會涉及到聯賽冠軍、歐洲賽資格或者降班席位嘅話，就會喺中立場踢場附加賽決高下，但家陣就會先睇對賽，而且作客入球較多嗰隊仲有優惠，計埋後都一樣先踢附加賽。