時裝業其實也是釀成環保問題的主要原因，其中「快時尚」更是對環境污染和勞工權益帶來莫大影響。香港設計師Toby Crispy和Kay Wong在時裝業打滾十多年，各自受盡市場潮流追求「多啲、快啲、平啲」的折磨。機遇下，她們在一個生日派對上互相認識，因為思想一致繼而一拍即合，成立了Fashion Clinic，希望透過推動upcycling，去醫治這個工業與客人的衣櫥，令大家再次愛上舊衣服。
撰文：陳蔚渝
攝影：郭賢興
Upcycling工作之前，Toby本身在一個法國時裝品牌擔任design manager，「快時尚」潮流為她工作帶來很大的影響與變化，「工作過量嘅情況好多，令我唔能夠繼續落去，同時都留意到對環境、勞工、動物嘅影響好大，我喺2013年開始做upcycling，成立Lastbutnotleast 。」Kay本身主理個人品牌超過十年，同樣受到「快時尚」的壓力，毅然結束品牌，去了北歐深造，「我喺當地感受慢活之餘，又睇咗好多紀錄片，發現呢個工業有好多黑暗嘅嘢，返嚟之後喺一個生日會上認識咗Toby，本身一直都有留意佢做嘅嘢。其實都討論咗超過一年，我哋認為一加一多過等如二，所以成立Fashion Clinic，我哋都覺得呢個工業好病態，而Clinic係一間診所，希望由小開始去做一啲改變。」
識揀好嘢
Fashion Clinic顧名思義就是一間時裝診所，目的是為舊衣服診治和改造，客人可以帶來舊衣服，透過主要的三個服務repair、reshape和redesign， 從而延續它們的生命。Kay分享診所理念，「我哋唔係叫大家完全唔好買嘢，而係應該揀好嘅嘢，choose well同buy smart ，我哋嘅服務係將一啲好嘅、鍾意嘅衫，幫客人延續佢哋生命，所以workshop通常都係帶一啲舊衫嚟一齊修補，教大家唔同嘅針步，例如日式刺繡技巧，點樣修補，簡單教大家改造舊衫嘅技巧。」
Toby表示主要是希望推動after sale service，「除咗提供個人服務，都希望多啲同呢個工業嘅唔同單位合作，包括舉行workshop，合作推出upcycling series，舉行各式各樣嘅展覽、講座，希望盡力推動呢個概念。」Toby又分享香港有很多經驗豐富的裁縫師傅，但大部份都年紀老邁，希望利用customer power和他們去reconnect，「多啲搵佢哋改衫，同埋希望令年輕人覺得呢行都係一個出路，咁先可以傳承落去。」
一世朋友
進行upcycling時，Toby與Kay會先叫客人填下therapists notes，希望了解以及延續衣服的故事，Toby說：「我哋越做得多，越覺得客人會攞啲有故事嘅衫嚟改造，我哋都希望去remind，或者recall佢哋嘅記憶，所以會有therapists notes畀佢哋寫幾時遇到、保存咗幾耐、點解唔鍾意佢、點樣會鍾意番佢、我哋目的只有一個，希望客人可以鍾意件衫耐啲。」
Toby又形容一件衣服可以是一世的朋友，因此也分享了一些環保貼士，就是「隔夜」，「好多人都會唔記得自己嘅衫，如果好想買，就諗吓會唔會着超過三十次，數目唔係一個指標，但都可以知道會唔會經常着到。」另外定期整理衣櫃， Toby笑言大家都很容易經常買適合，又或者不適合的衣服，「見到同記得自己有乜嘢衫，就可以避免擁有過多唔適合嘅衫。」
Kay幫林一峰十年晒冷
接觸各式各樣的故事，當然有不少難忘的改造經驗。Kay分享了其中一次幫歌手林一峰的大改造，「一直有同林一峰合作，之前佢做演唱會，將過去十年儲起演出着過嘅衫畀我，叫我幫佢哋變身。其實全部衫都啱身，但因為之前着過，我就幫佢哋refresh，係好玩同challenging嘅經驗。」
Toby搞小塵埃無可再做
Toby就曾經幫組合小塵埃的《叱咤頒獎禮》戰衣改造再改造，「佢哋2016年開始搵我，做2017年《叱咤》嘅衫，我將一件vintage trench coat變成兩件畀佢哋着，2018年佢哋又再搵我，咁就諗不如用番上年件衫再upcycle多次。2019年就決定將佢upcycle到無可再做，現時係upcycle咗三次。」
更多精采時尚內容，盡在 http://add.appledaily.com。